ლატვიის პარლამენტმა (სეიმი), მეორე მოსმენით, მიიღო გადაწყვეტილება რუსეთიდან და ბელარუსიდან ლატვიაში სასოფლო-სამეურნეო პროდუქციის იმპორტის მინიმუმ 2025 წლის ივლისამდე აკრძალვის შესახებ.
„სოფლის მეურნეობისა და სოფლის განვითარების შესახებ“ კანონში აღნიშნული ცვლილებების შეტანას 69-მა დეპუტატმა დაუჭირა მხარი, წინააღმდეგი იყო 9 პარლამენტარი, თავი არავის შეუკავებია.
ლატვია გახდა ევროკავშირის პირველი ქვეყანა, რომელმაც რუსული და ბელარუსული წარმოების სასოფლო-სამეურნეო პროდუქტების მოხმარებაზე შეზღუდვები შემოიღო.
სეიმას მიერ მხარდაჭერილი საკანონმდებლო ცვლილებები კრძალავს რუსეთსა და ბელარუსში წარმოებული სასოფლო-სამეურნეო და საკვები პროდუქტების ლატვიაში იმპორტს, ასევე ანალოგიური პროდუქციის მესამე ქვეყნებიდან იმპორტს.
აღნიშნული გადაწყვეტილების ძალაში შესვლიდან 14 დღის ვადაში, მთავრობამ რეგულაციებით უნდა განსაზღვროს იმ კონკრეტული პროდუქტების სია, რომელთა ქვეყანაში შემოტანა აიკრძალება.
აკრძალვა 2025 წლის 1 ივლისამდე იქნება ძალაში.
ტერმინი „იმპორტი“ კანონში განმარტებულია, როგორც „პროდუქციის თავისუფალ მიმოქცევაში გაშვება ან ქვეყნის შიგნით მისი გადამუშავება და საბოლოო მოხმარება, გარდა იმ შემთხვევისა, როდესაც პროდუქციის იმპორტირება ხორციელდება ევროკავშირის სხვა წევრ ქვეყანაში შეტანის მიზნით და ის გათავისუფლებულია დამატებული ღირებულების გადასახადისგან“.
ლატვიის მთავრობას დაევალა, 2025 წლის 1 მარტამდე სეიმს წარუდგინოს ანგარიში ამ აკრძალვის ქვეყნის ეკონომიკაზე გავლენის შესახებ და, საჭიროების შემთხვევაში, – სეიმს რეგულაციებში ნებისმიერი ცვლილების შეტანა შესთავაზოს.
სოფლის მეურნეობის სამინისტროს მონაცემებით, გასული წლის პირველ 10 თვეში რუსული სოფლის მეურნეობისა და საკვები პროდუქტების ლატვიაში იმპორტმა 280 მილიონ ევროს მიაღწია, რაც რუსეთიდან ევროკავშირის ქვეყნებში მთლიანი იმპორტის 12%-ს შეადგენს. ამ მაჩვენებლით ლატვია ევროკავშირის წევრ-სახელმწიფოებს შორის მეორე ადგილზეა.
როგორც კანონპროექტის ანოტაციაშია აღნიშნული, აკრძალვის მიზანია, აგრესორი ქვეყნებისა და მათი კომპანიების ბიუჯეტებმა, ლატვიაში საკუთარი პროდუქციის შეტანის გზით, არ მიიღონ დამატებითი შემოსავალი, რომელიც უკრაინაში ომის გაგრძელებას შეუწყობს ხელს.
აღნიშნული აკრძალვის მიუხედავად, გაგრძელდება რუსული და ბელარუსული სოფლის მეურნეობისა და საკვები პროდუქტების ტრანზიტი ევროკავშირის სხვა ქვეყნებში (ლატვიის გავლით). ლატვიაში, შიდა მოხმარებისთვის, რუსული და ბელარუსული მარცვლეულის მხოლოდ 1,4% რჩება, საკვები პროდუქტის შესახებ კი ასეთი მონაცემები არ არსებობს.
„ეროვნული ალიანსის“ წევრებმა კანონპროექტი გააკრიტიკეს და განაცხადეს, რომ შემოთავაზებული ცვლილებები რუსული მარცვლეულის ლატვიაში იმპორტს მხოლოდ მცირედით შეამცირებს და ამდენად, სეიმის გადაწყვეტილება ბიუროკრატიულ ზომას და „საქმიანობის იმიტაციას“ უფრო წარმოადგენს, ვიდრე გაბედულ პოლიტიკურ გადაწყვეტილებას.