პარლამენტის შენობასთან გამჭვირვალობის კანონის საწინააღმდეგო საპროტესტო აქცია დასრულებულია. ოპოზიციის ლიდერებმა და აქციის მონაწილეთა უმეტესობამ ტერიტორია დატოვეს. რუსთაველის გამზირზე აქციის მონაწილეთა მხოლოდ მცირერიცხოვანი ჯგუფი რჩება. ადგილზე იმყოფებიან სამართალდამცველებიც.
შსს-ს ინფორმაციით, რუსთაველის გამზირსა და პარლამენტის შენობის ტერიტორიაზე მიმდინარე აქციის დროს აქციის მონაწილეები ფიზიკურად დაუპირისპირდნენ პოლიციელებს და მათი მიმართულებით ისროლეს სხვადასხვა ბლაგვი საგანი, მათ შორის, ქვები და ბოთლები. დაშავდა შინაგან საქმეთა სამინისტროს თანამშრომელი, რომელიც გადაყვანილია კავკასიის მედიცინის ცენტრში. ასევე, დაზიანებულია სამინისტროს კუთვნილი ავტომობილი. ფიზიკური დაპირისპირების აღსაკვეთადაც შინაგან საქმეთა სამინისტრომ გამოიყენა სპეციალური საშუალება – ე.წ. წიწაკის სპრეი. სამართალდამცველების მიერ კანონდარღვევისათვის ადმინისტრაციული წესით დაკავებულია 11 პირი.
აქციის მონაწილეები ასევე თავს დაესხნენ „იმედის“ გადამღებ ჯგუფს. აგრესიულად განწყობილი ჯგუფები ხელით ეხებოდნენ როგორც „იმედის“ ჟურნალისტებს, ისე ტელევიზიის ინვენტარს. ისმოდა შეურაცხმყოფელი განცხადებები. გადამღებ ჯგუფს პროფესიული საქმიანობის განხორციელებაში ხელს უშლიდნენ ევროკავშირის დროშით აღჭურვილი ადამიანები.