ჩვენთან აშშ-ის მოქალაქეებს არ სჭირდებათ ვიზა. რა თქმა უნდა, სწორი საპასუხო ნაბიჯი იქნებოდა, რომ საქართველოს მოქალაქეებსაც არ სჭირდებოდათ ვიზა აშშ-ში შესასვლელად, – ამის შესახებ ჟურნალისტებს პარლამენტის თავმჯდომარემ, შალვა პაპუაშვილმა განუცხადა.
„ზოგადად ბოლო პერიოდში ვატყობთ, რომ რაღაც ისეთი წარმოჩენა არის, თითქოს საქართველოს ყველაფერს სთავაზობენ, იქნება ევროკავშირი თუ აშშ, და საქართველო რაღაცებზე ამბობს უარს. სინამდვილეში მდგომარეობა უკვე წლებია, პირიქით არის. დიდი ხანია ჩვენ სწორედ სტრატეგიული პარტნიორობიდან გამომდინარე ვითხოვთ, რომ თუკი ეს სტრატეგიული პარტნიორობაა, იყოს თანაბარი დამოკიდებულება. ჩვენთან აშშ-ის მოქალაქეებს არ სჭირდებათ ვიზა. რა თქმა უნდა, ეს იქნებოდა სწორი საპასუხო ნაბიჯი, რომ საქართველოს მოქალაქეებსაც არ სჭირდებოდათ ვიზა აშშ-ში შესასვლელად. ასევე სხვა თემები, თავისუფალი ვაჭრობის საკითხი და სხვა საკითხები, რომლებიც თუკი ვსაუბრობთ სტრატეგიულ პარტნიორობაზე, ასეც უნდა იყოს. არაბუნებრივია, რომ ეს ასე არ არის, ვინაიდან თუკი ურთიერთობას ვეძახით სტრატეგიულ პარტნიორობას, მაშინ ეს უნდა იყოს უფრო მაღალი დონის ურთიერთობა, ვიდრე ჩვენ გვაქვს სხვა ქვეყნებთან. ამიტომაც სინამდვილეში საქმე არის პირიქით: ჩვენ ვითხოვთ უფრო მეტ ინტეგრაციას და დაახლოებას სტრატეგიულ პარტნიორთან, ჩვენ ვითხოვთ ნატოს წევრობას და უარს ვიღებთ, ვითხოვთ მოლაპარაკების გახსნას და უარს ვიღებთ. ასე რომ, ბურთი სრულად არის ჩვენი დასავლელი კოლეგების მხარეს“, – აღნიშნა პაპუაშვილმა.