საფრანგეთის ყოფილი პრეზიდენტის, ნიკოლა სარკოზის მეუღლე, კარლა ბრუნი სასამართლო ზედამხედველობის ქვეშ მოათავსეს. ინფორმაციას ამის შესახებ ფრანგული მედია ავრცელებს.
საუბარია საქმეზე, რომლის თანახმად, ნიკოლა სარკოზიმ 2007 წელს მუამარ კადაფისგან ფული მიიღო მისი საარჩევნო კამპანიის დასაფინანსებლად. საქმის მთავარი მოწმე, ბიზნესმენი ზიად ტაკიდინი ამტკიცებდა, რომ 2006 და 2007 წლებში სარკოზის გადასცა სამი ჩემოდანი, რომელშიც ხუთი მილიონი ევროს ნაღდი ფული იყო, თუმცა 2020 წელს ტაკიდინმა მოულოდნელად უარი თქვა ჩვენებაზე, რამაც გააჩინა ეჭვი, რომ სარკოზის შეეძლო მასზე ზეწოლა მოეხდინა.
როგორც ფრანგული ტელეარხი BFMTV იუწყება, კარლა ბრუნი ეჭვმიტანილია „მოწმეთა მოსყიდვის დამალვაში“ და „დანაშაულებრივ შეთქმულებაში სასამართლოს მოტყუებასა და უცხოელი საჯარო მოხელეების მოსყიდვასთან დაკავშირებული დანაშაულების მომზადებაში“.