აშშ-ის პრეზიდენტობის სავარაუდო კანდიდატი რესპუბლიკური პარტიიდან დონალდ ტრამპი არჩევნებში გამარჯვების შემთხვევაში ნატოს მოკავშირეებს ამერიკის სადაზვერვო ინფორმაციაზე წვდომას შეუზღუდავს. სტატიას ამის შესახებ Politico აქვეყნებს.
როგორც სტატიაშია აღნიშნული, ნატოს წევრები და პარტნიორები დამოკიდებულები არიან აშშ-ის სადაზვერვო ინფორმაციაზე, რომლის წყალობითაც, მათ შორის, უკრაინა უმკლავდება რუსეთს.
ტრამპის მრჩევლებმა ნატოს წევრი ქვეყნების წარმომადგენლებს უკვე განუცხადებს, რომ სადაზვერვო ინფორმაციაზე წვდომის შეზღუდვა მისი გეგმის მცირე ნაწილია. აშშ-ის ყოფილი პრეზიდენტი აპირებს, რომ ამერიკასა და ნატოს წევრ 32 ქვეყანას შორის არსებული თანამშრომლობა შეამციროს.
გამოცემის თანახმად, ტრამპი პრეზიდენტობის დროს არაერთხელ აკრიტიკებდა ნატოს, ხოლო სადაზვერვო ინფორმაციაზე წვდომის შეზღუდვამ შესაძლოა კატასტროფული შედეგები გამოიწვიოს, განსაკუთრებით უკრაინისთვის.
„ზუსტად რომ ამერიკულმა დაზვერვამ დაარწმუნა ნატოს მრავალი ქვეყანა, რომ პუტინს უკრაინაში შეჭრა გადაწყვეტილი ჰქონდა“, – ციტირებს Politico ერთ-ერთ ევროპელ ჩინოვნიკს. „ზოგ ქვეყანას არ სჯეროდა, რომ რუსეთს წარმატებული სამხედრო კამპანიის წარმოების შესაძლებლობა აქვს“.
გამოცემა ტრამპის წინასაარჩევნო შტაბის ერთ-ერთ წარმომადგენელს აღნიშნულის თაობაზე კომენტარი სთხოვა, რაზეც მან ტრამპის სიტყვების ციტირება მოახდინა და თქვა, რომ ყოფილი პრეზიდენტი „აღადგენს მშვიდობას და ამერიკის სიძლიერეს და შეკავების პოლიტიკას მსოფლიოში“.
ტრამპის სამომავლო გეგმები ვაშინგტონში მიმდინარე ნატოს სამიტზეც განიხილეს. ერთ-ერთმა ამერიკელმა მაღალჩინოსანმა ისიც თქვა, რომ აშშ-ის მხრიდან სადაზვერვო ინფორმაციაზე წვდომის შეზღუდვამ შესაძლოა შეამციროს ევროპის შესაძლებლობები, წინ აღუდგეს რუსეთს, თუ რუსეთის პრეზიდენტი ვლადიმერ პუტინი უკრაინის ფარგლებს გარეთ სამხედრო ოპერაციის ჩატარებას გადაწყვეტს.