მგონი, სისხლის სამართლის კოდექსში მუხლი არ დარჩენილა, რომელიც ამ ადამიანს დარღვეული არ აქვს, რომლითაც ბრალდებული ან მსჯავრდებული არ არის, – ამის შესახებ ფრაქცია „ქართული ოცნების“ თავმჯდომარის მოადგილე არჩილ გორდულაძემ „შაბათის ქრონიკასთან“ განაცხადა. აღნიშნული განცხადებით იგი გამოეხმაურა კითხვას, თუ რატომ არ ეხება ამნისტია ექსპრეზიდენტ მიხეილ სააკაშვილს.
„სააკაშვილს, მიხეილ სააკაშვილს გულისხმობთ ხომ ალბათ? არაჟნების ხელმწიფეს, რომელმაც არაჟნების კონტეინერით გადმოკვეთა საზღვარი. ცოტა რთულია ალბათ, რომ ვილაპარაკოთ მიხეილ სააკაშვილზე და მასთან დაკავშირებულ სასჯელებზე, იმიტომ, რომ ადამიანურად შეუძლებელია ვისაუბროთ მასზე ემოციის გარეშე. მგონი, სისხლის სამართლის კოდექსში მუხლი არ დარჩენილა, რომელიც ამ ადამიანს დარღვეული არ აქვს, რომლითაც ბრალდებული ან მსჯავრდებული არ არის და ეს ადამიანები, რომლებიც მიხეილ სააკაშვილთან დაკავშირებით საუბრობენ, სამწუხაროდ, ჩვენს მოსახლეობას არ აწვდიან ინფორმაციას რა მუხლებით არის ეს ადამიანი მსჯავრდებული თუ ბრალდებული და რა კატეგორიის მუხლებს ეხება.
მაგალითად, რომ ვთქვათ, კორუფციასთან დაკავშირებულს და სამოხელეო დანაშაულს. ერთი წამით მაინც წარმოიდგინეთ, რომ ჩვენ ამ ამნისტიის პროექტში გაგვეთვალისწინებინა ისეთი მუხლები, რომლებიც კორუფციას და სამოხელეო დანაშაულს შეეხება, ხომ წარმოგიდგენიათ ეს ადამიანები რა ამბავს ატეხდნენ და რას იტყოდნენ, რომ აი ნახეთ, თავიანთი ხელისუფლების დროს დაკავებული ადამიანების გამოშვება უნდათო და ამ სპეკულაციებში გადავარდებოდნენ და ამ დროს მიხეილ სააკაშვილია ასეთი მუხლებით მსჯავრდებული.
ჩვენთვის არ აქვს მნიშვნელობა პიროვნულად, კონკრეტულ შემთხვევაში რომელი მუხლით რომელი ადამიანია მსჯავრდებული. მთავარია დანაშაულის ბუნება და დამოკიდებულება და სახელმწიფო პოლიტიკა ასეთი სახის დანაშაულების მიმართ როგორია. რა თქმა უნდა, უმკაცრესია კორუფციასთან ბრძოლა, უმკაცრესია სამოხელეო დანაშაულთან, სიცოცხლის მოსპობასთან, სქესობრივ დანაშაულებთან. მაშინ რა პრინციპით უნდა ავიღოთ? პიროვნული, სუბიექტური გადაწყვეტილებები უნდა მიგვეღო თუ ობიექტურად უნდა გვემსჯელა დანაშაულებთან დაკავშირებით. ცალსახად, რა თქმა უნდა, ობიექტურობაზე. რაც შეეხება სუბიექტურ გადაწყვეტილებებს, ეს მხოლოდ და მხოლოდ პრეზიდენტად წოდებულ სალომე ზურაბიშვილს უფრო ეხება, მიემართება, რადგანაც მის ხელშია, რომ კონკრეტულ ადამიანებზე იმსჯელოს და მიიღოს პოლიტიკური გადაწყვეტილებები არაერთი პოლიტიკური გადაწყვეტილება და პოლიტიკურად მოტივირებული შეწყალებები გვინახავს მის მიერ“, – აღნიშნა არჩილ გორდულაძემ.