ახლო აღმოსავლეთში შექმნილ ვითარებას, აზიური ტურნეს ფარგლებში, იაპონიაში მყოფი ენტონი ბლინკენი გამოეხმაურა. შეერთებული შტატების სახელმწიფო მდივანმა გოლანის მაღლობზე მომხდარი ტრაგედიის გამო მწუხარება გამოთქვა და კიდევ ერთხელ გაუსვა ხაზი ისრაელის უფლებას, დაიცვას თავი ნებისმიერი საფრთხისგან, თუმცა ისიც აღნიშნა, რომ შეერთებულ შტატებს კონფლიქტის ესკალაცია არ სურს.
„ტერორიზმს გამართლება არ აქვს – ეს უდავოა. ყველაფერი მიუთითებს, რომ რაკეტები „ჰეზბოლას“ მიერ იყო გაშვებული. ჩვენ მხარს ვუჭერთ ისრაელის უფლებას, თავისი მოქალაქეები ტერორისტული თავდასხმებისგან დაიცვას. ერთ -ერთი მიზეზი, რის გამოც დაუღალავად ვმუშაობთ ცეცხლის შეწყვეტისთვის, არის არა მხოლოდ ღაზის სექტორში მშვიდობა, არამედ ისრაელსა და ლიბანს შორის ხანგრძლივი მშვიდობის დამყარება. ჩვენი მიზანი, ღაზაში კონფლიქტის დასრულებაა, რომელიც დიდი ხანია გრძელდება და ძალიან ბევრი სიცოცხლე შეიწირა. არ გვსურს კონფლიქტის ესკალაცია“, – განაცხადა ბლინკენმა.
27 ივლისს, გოლანის მაღლობის ჩრდილოეთზე განხორციელებული საჰაერო თავდასხმის შედეგად, ბოლო მონაცემებით, დაღუპულია 12-მდე ადამიანი, მათ შორის ბავშვები. დაშავებულია 30-მდე ადამიანი. ისრაელი მომხდარზე პასუხისმგებლობას „ჰეზბოლას“ აკისრებს. დაჯგუფება ბრადლებას უარყოფს.