აშშ-ის პრეზიდენტი, ჯო ბაიდენი უზენაესი სასამართლოს რეფორმის ინიციატივით გამოდის, რომელიც მოიცავს მოსამართლეების თანამდებობაზე ყოფნის ვადის შეზღუდვასა და ქცევის სავალდებულო კოდექსის დაწესებას. ინფორმაციას ამის შესახებ სააგენტო Reuters-ი ავრცელებს.
ჯო ბაიდენის ინიციატივის თანახმად, აშშ-ის უზენაესი სასამართლოს მოსამართლეების თანამდებობაზე სამუდამო ვადით ყოფნა 18-წლიანი ვადით უნდა შეიცვალოს.
გარდა ამისა, ქცევის კოდექსის თანახმად, მოსამართლეები ვალდებულნი იქნებიან, გაასაჯაროონ მიღებული საჩუქრები და თავი შეიკავონ პოლიტიკური ქმედებებისგან.
„ის, რაც ახლა ხდება, არ არის ნორმალური და ეს ძირს უთხრის საზოგადოების ნდობას სასამართლოს გადაწყვეტილებების მიმართ, მათ შორის იმით, რომ ეს გავლენას ახდენს პირად თავისუფლებებზე. ჩვენ შეგვიძლია და უნდა აღვადგინოთ საზოგადოების ნდობა უზენაესი სასამართლოს მიმართ. ჩვენ შეგვიძლია და უნდა გავაძლიეროთ დემოკრატიის საფუძველი. ამერიკაში კანონზე მაღლა არავინ დგას. ამერიკაში ხალხი მართავს“, – აღნიშნავს ჯო ბაიდენი.
სააგენტო Reuters-ი აღნიშნავს, რომ ღრმად დაყოფილი კონგრესი ნიშნავს, რომ ბაიდენის ინიციატივას განხორციელების მცირე შანსი აქვს.