არსებობს საერთაშორისო კონტექსტი, არსებობს ადგილობრივი კონტექსტი და ამ კონტექსტების გათვალისწინებით, მგონი არავისთვის უნდა იყოს გასაკვირი, რომ ვიღაცის თავში ასეთი გეგმები იხარშება და მზადდება, – ამის შესახებ საქართველოს პრემიერ-მინისტრმა ირაკლი კობახიძემ ბიძინა ივანიშვილის მკვლელობის მომზადების საქმეზე საუბრისას „იმედი LIVE“-ში განაცხადა.
„რაც შეეხება საერთაშორისო კონტექსტს, არსებობს გარკვეული ხელწერა, რომელიც უკვე თვალნათელი გახდა. ჩვენ ვნახეთ ტერორისტული აქტი, მკვლელობის მცდელობა სლოვაკეთში, ჩვენ ვნახეთ ტერორისტული აქტი, მკვლელობის მცდელობა აშშ-ში – ერთი და იგივე ხელწერა. ეს არის საერთაშორისო კონტექსტი და ეს ძალები მოქმედებენ მსოფლიოს სხვადასხვა სივრცეში, სხვადასხვა ქვეყანაში. მათ აქვთ ამის რესურსი. რაც შეეხება ადგილობრივ კონტექსტს, თქვენ იცით, რომ „ნაცმოძრაობა“ არის ყველაფრის შემსრულებელი. ერთ-ერთი, რითაც ისინი გამოირჩეოდნენ ხელისუფლებაში ყოფნის დროს, ეს იყო მკვლელობები. პირდაპირ ქუჩაში კლავდნენ ახალგაზრდებს. ათეულობით ახალგაზრდა უბრალოდ ქუჩაში მოკლეს. აქედან გამომდინარე მათგან არავის უნდა გაუკვირდეს ასეთი ტიპის დანაშაულის ჩაფიქრება, მომზადება. ეს არის კონტექსტი, საერთაშორისო და ადგილობრივი კონტექსტი. დანარჩენი უნდა დაადგინოს გამოძიებამ“, – აღნიშნა მთავრობის მეთაურმა.