დარწმუნებული ვარ, თქვენც შეძლებთ ქართველი გულშემატკივრის გახარებას. მინდა წარმატებები გისურვოთ, ღმერთი იყოს თქვენი და საქართველოს მფარველი, – ამ სიტყვებით მიმართა თბილისის მერმა კახა კალაძემ პარალიმპიურ სპორტსმენებს ოლიმპიადაზე გამგზავრების წინ გამართულ ცერემონიაზე.
მისივე თქმით, ხელისუფლება ყოველთვის იქნება სპორტსმენების გვერდით და ყველაფერს გააკეთებს სპორტის განვითარებისთვის.
„მინდა წარმატებები ვუსურვო ჩვენს პარასპორტსმენებს. 6 სახეობაში 14 სპორტსმენი წარდგება ოლიმპიადაზე, რაც ძალიან დიდი მიღწევაა. დარწმუნებული ვარ, რომ ჩვენ ბევრი მიმართულებით მივაღწევთ წარმატებას. ისიც მინდა აღვნიშნო, რომ ბოლო წლების განმავლობაში ძალიან ბევრი რამ გაკეთდა ზოგადად სპორტის მიმართულებით. ცხადია, ჯერ კიდევ არსებობს გამოწვევები, პრობლემები, თუმცა, მინდა ერთი რამ გაგიზიაროთ და დაგპირდეთ, რომ ხელისუფლება ყოველთვის იქნება სპორტსმენების გვერდით. ყველაფერს გავაკეთებთ იმისთვის, რომ კიდევ უფრო მეტი ინფრასტრუქტურა შეიქმნას, მეტი დარბაზი აშენდეს და მეტი გაკეთდეს იმისთვის, რომ სპორტი იყოს წარმატებული. შემთხვევითი არ არის ის წარმატებები, რაც ჩვენ ბოლო წლების განმავლობაში მოვიპოვეთ სპორტის სხვადასხვა მიმართულებით. დარწმუნებული ვარ, თქვენც შეძლებთ ქართველი გულშემატკივრის გახარებას. მინდა წარმატებები გისურვოთ, ღმერთი იყოს თქვენი და საქართველოს მფარველი“,- აღნიშნა კახა კალაძემ.