ჯანდაცვის მსოფლიო ორგანიზაციის გენერალური დირექტორი ტედროს ადანომ გებრეისუსი აცხადებს, რომ ღაზის სექტორში პოლიომიელიტი გამოვლინდა. გებრეისუსის თქმით, პრევენციული ზომების სწრაფად მიღების გარეშე, ბავშვებში დაავადების გავრცელების საფრთხე არსებობს.
„ღაზაში პოლიომიელიტის გამოვლენა კიდევ ერთი შეხსენებაა იმ მძიმე პირობების, რომელშიც მოსახლეობა აღმოჩნდა. კონფლიქტის გაგრძელება აფერხებს ძალისხმევას პოლიომიელიტის მსგავსი საფრთხეების გამოსავლენად და რეაგირებისთვის“, – წერს ჯანდაცვის მსოფლიო ორგანიზაციის ხელმძღვანელი სოციალურ ქსელ X-ში.
თავის პოსტს ის თან ურთავს მის მიერ ფრანგ გამოცემა Le Monde-ში გამოქვეყნებულ სტატიას, სადაც აღნიშნავს, რომ პოლიომიელიტის ვირუსი აღმოჩენილია ღაზაში ჩამდინარე წყლებში. მისი განცხადებით, იმის მიუხედავად, რომ ადამიანებში პოლიომიელიტის შემთხვევა ჯერ არ დაფიქსირებულა, დაუყოვნებლივი ქმედებების გარეში, დაავადების ათასობით დაუცველ ბავშვში გავრცელება მხოლოდ დროის საკითხი იქნება.
ტედროს ადანომ გებრეისუსის თქმით, ჯანდაცვის მსოფლიო ორგანიზაცია ღაზაში მილიონზე მეტ ვაქცინას გაგზავნის, რომელთა ადმინისტრირება უახლოეს კვირებში მოხდება, რათა დაავადება ბავშვებში არ გავრცელდეს.