ოთხშაბათს, 31 ივლისს, პოლონეთში ვიზიტით მყოფი გერმანიის პრეზიდენტი, ფრანკ-ვალტერ შტაინმაიერი, ვარშავის აჯანყების 80 წლისთავის წინა დღეს, ამ აჯანყების ვეტერანებს შეხვდა და მათ „პატიება“ სთხოვა. ნაცისტური გერმანიის საოკუპაციო ძალების წინააღმდეგ შეიარაღებული აჯანყება 1944 წლის 1 აგვისტოს დაიწყო და ორი თვე გაგრძელდა, რის შემდეგაც მისი ჩახშობა მოხერხდა. 63-დღიან ბრძოლაში თითქმის 200 000 ადამიანი, ძირითადად, მშვიდობიანი მოსახლეობა დაიღუპა, ხოლო პოლონეთის დედაქალაქი ნანგრევებად იქცა. „არ არსებობს სიტყვები, რომლითაც ამ საშინელების გადმოცემა შეიძლება… ბოდიშს ვიხდი აქ და ახლა“, – მიმართა შტაინმაიერმა ვეტერანებს ვარშავის მოედანზე, სადაც აჯანყების დაწყების შემდეგ, ერთ-ერთი პირველი ბრძოლა გაიმართა.
კარგად აღჭურვილი ნაცისტი ოკუპანტების წინააღმდეგ 50 000 მებრძოლის წარუმატებელ აჯანყებას ბევრი პოლონეთის სისხლიან და მშფოთვარე ისტორიაში ყველაზე ტრაგიკულ ეპიზოდად მიიჩნევს. ვარშავის აჯანყების მუზეუმის მონაცემებით, ამჟამად ცოცხალი მხოლოდ 400-მდე ყოფილი მებრძოლია დარჩენილი. პოლონეთის ამჟამინდელმა პროევროპულმა მთავრობამ, პრემიერ-მინისტრ დონალდ ტუსკის ხელმძღვანელობით, მოუწოდა გერმანიას, გადაიხადოს ფინანსური კომპენსაცია იმ ზარალისთვის, რომელიც პოლონეთმა მეორე მსოფლიო ომის დროს ნაცისტური ჯარების ხელში განიცადა. ამით მან პოპულისტური პარტია „კანონი და სამართლიანობის“ ანალოგიური მოწოდება გაიმეორა, რომელმაც ძალაუფლება გასული წლის ოქტომბერში დაკარგა.
ვარშავაში ვიზიტის დროს, შტაინმაიერმა ისაუბრა გერმანიის მთავრობის განზრახვაზე, რომელიც ბერლინში ნაციზმის პოლონელ მსხვერპლთა ხსოვნისადმი მიძღვნილი მემორიალის შექმნას ითვალისწინებს. „ამჟამად ბევრი სხვა რამეც კეთდება, მათ შორის – მსხვერპლთათვის, ვინც გერმანულ ოკუპაციას გადაურჩა. ჩვენი მთავრობები მჭიდროდ თანამშრომლობენ ამ საკითხზე“, – განაცხადა მან. პოლონური მხარის მიერ მოთხოვნილი კომპენსაციის შესახებ გერმანიის პრეზიდენტს კომენტარი არ გაუკეთებია. ამასთან, მან უკრაინაში რუსეთის შეჭრის გამო სინანული გამოთქვა.
„რუსეთის პრეზიდენტი ვლადიმერ პუტინი უკრაინის განადგურებისკენ ისწრაფვის და ყველას გვემუქრება“, – აღნიშნა შტაინმაიერმა და პირობა დადო, რომ უკრაინისა და მისი ხალხის მხარდაჭერას გააგრძელებს. „ჩვენ მხარს ვუჭერთ მათ გმირულ ბრძოლაში, ასევე მხარს ვუჭერთ უკრაინას ევროკავშირში გაწევრიანების გზაზე“, – დასძინა მან.