გერმანიაში მოკლული ზელიმხან ხანგოშვილის მეუღლემ, მანანა ციატიევამ განაცხადა, რომ გერმანიის ხელისუფლებამ არ შეატყობინა მათ ვადიმ კრასიკოვის გაცვლის შესახებ. ინფორმაციას ამის შესახებ რადიო თავისუფლება ავრცელებს.
„გაცვლაზე არავინ გვკითხა. ის ფაქტი, რომ ეს მოხდა, ცხადყოფს, რომ გერმანიის ხელისუფლებისთვის დაზარალებულთა აზრი არ არის მნიშვნელოვანი“, – აღნიშნა მანანა ციატიევამ.
„ვერც კი წარმოვიდგენდი, რომ ასეთ რამეს გააკეთებდნენ. გამოდის, რომ ნებისმიერი კანონის უგულებელყოფა შეიძლება პოლიტიკური მიზეზების გამო“, – დასძინა მან.
მანამდე გერმანიის კანცლერმა განაცხადა, რომ ზელიმხან ხანგოშვილის მკვლელობისთვის გერმანიაში მსჯავრდებული ვადიმ კრასიკოვის რუსეთისთვის გადაცემა იოლი გადაწყვეტილება არ იყო.
თურქეთის დედაქალაქ ანკარაში, რუსეთსა და დასავლეთის რიგ ქვეყნებს შორის პატიმართა გაცვლა შედგა.