ესპანეთის კატალონიის ყოფილი ლიდერი კარლეს პუჩდემონი, რომელიც შვიდი წლის მანძილზე ქვეყნიდან გაქცეული იყო და გამოძიებას თავს არიდებდა, ესპანეთში დაბრუნდა. ინფორმაციას ამის შესახებ Politico ავრცელებს.
პუჩდემონს ბარსელონის ცენტრში, ადგილობრივი პარლამენტის შენობასთან ასობით მომხრე დახვდა. „ჩვენთვის ზიანის მიყენების ყველა მცდელობის მიუხედავად, მე დღეს აქ ჩამოვედი, რათა შევახსენო მათ, რომ ჩვენ კვლავ აქ ვართ და დანებებას არ ვაპირებთ. გაუმარჯოს თავისუფალ კატალონიას!“, – თქვა პუჩდემონმა მიტინგზე.
პუჩდემონი ესპანეთში მას შემდეგ დაბრუნდა, რაც ივნისში ძალაში შევიდა კანონი ამნისტიის შესახებ. კანონი სისხლის სამართლებრივი პასუხისმგებლობისგან კატალონიურ სეპარატიზმთან კავშირში მყოფი ყველა პირის გათავისუფლებას ითვალისწინებს. თუმცა, ესპანეთის უზენაესმა სასამართლომ პუჩდემონის ამნისტიაზე უარი განაცხადა იმ მოტივით, რომ სახელმწიფო ფულის გაფლანგვა, რაც მას ბრალად ედებოდა, ამნისტიას არ ექვემდებარება.
61 წლის პუჩდემონი კატალონიის მეთაური 2016 – 2017 წლებში იყო. 2017 წლის 1 ოქტომბერს მისი მეოხებით კატალონიაში ესპანეთისგან გამოყოფის რეფერენდუმი ჩატარდა, რომელიც მადრიდმა უკანონოდ ცნო და პოლიტიკოსი თანამდებობიდან გადააყენა. ამ მოვლენების შემდეგ მალევე პუჩდემონი ბელგიაში გაიქცა.