რუსეთის შეიარაღებულმა ძალებმა უკრაინის დონეცკის ოლქში მდებარე ქალაქი კონსტანტინოვკა დაბომბეს. ინფორმაციას ამის შესახებ უკრაინული საინფორმაციო სააგენტო unian.net ავრცელებს.
სააგენტოს ცნობით, ჭურვი ქალაქის სუპერმარკეტს მოხვდა. დაღუპულია ორი ადამიანი, 17 კი დაშავებულია.
„რუსებმა ქალაქი ლულიანი არტილერიის გამოყენებით დაბომბეს და სუპერმარკეტს მოარტყეს. ეს მორიგი მიზანმიმართული დარტყმაა ხალხმრავალ ადგილას, რუსების მორიგი ტერორის აქტია. ერთ-ერთი დაჭრილი მძიმე მდგომარეობაშია. მას საჭირო სამედიცინო დახმარებას უწევენ“, – ციტირებს სააგენტო დონეცკის საოლქო ადმინისტრაციის თავმჯდომარეს ვადიმ ფილაშკინს.
ფილაშკიმა ასევე აღნიშნა, რომ დაბომბვის შედეგად მიყენებული ზარალის აღწერა მიმდინარეობს. ადგილზე პოლიცია, მაშველები და ექიმები მუშაობენ.
ფაქტს გამოეხმაურნენ უკრაინის პრეზიდენტის ოფისში. „კონსტანტინოვკის სუპერმარკეტის დაბომბვა რუსების მიერ განხორციელებული მორიგი ტერორია. რუსებმა სრულად უნდა გადაიხადონ იმის ფასი, რასაც სჩადიან“, – დაწერა უკრაინის პრეზიდენტის ოფისის ხელმძღვანელმა ანრეი ერმაკმა თავის ტელეგრამ არხზე.