მარიამ ქვრივიშვილი „ქრონიკასთან“ აცხადებს, რომ საერთაშორისო ფორუმებზე საქართველოს ცნობადობა საგრძნობლად გაზრდილია. ეკონომიკის მინისტრის მოადგილის თქმით, ცნობადობის გაზრდას წინ უსწრებს ის მარკეტინგული კამპანიები, რასაც სამინისტრო საერთაშორისო არეალზე აწარმოებს.
„როდესაც ჩვენ ვსაუბრობთ საქართველოს პოპულარიზაციაზე ეს არ გულისხმობს მხოლოდ რეკლამებს, რომელიც შეიძლება ტურისტებმა ნახონ წამყვან ტელევიზიებსა თუ სოციალურ ქსელებში,. ეს არის კომპლექსური პროცესი. ძალიან ეფექტურია ტურისტული გამოფენები, განსაკუთრებით კერძო სექტორისთვის, რადგან იქ იქმნება პლატფორმა კონკრეტული ქვეყნების წამყვან კომპანიებთან ურთიერთობებისა და ბიზნეს საქმიანობების დამყარების. ბოლო წარმატებული გამოფენა იყო კორეის ტურისტული ბაზარი, სადაც საქართველო წარსდგა კერძო სექტორთან ერთად. ძალიან დიდი მოთხოვნა და ინტერესია საქართველოს მიმართულებით.
ასევე ვიყავით ლონდონში, National Geographic Traveller Food Fest-ზე, სადაც მოხდა ქართული გასტრონომიისა და ღვინის პოპულარიზაცია. სამი დღის განმავლობაში შესაძლებლობა გვქონდა წარგვედგინა ჩვენი ქვეყნის გასტრონომია, ისევე როგორც ქართული ღვინო. თამამად შემიძლია გითხრათ, რომ არ იყო არცერთი ქვეყანა სადაც ამხელა ინტერესი იყო გამოხატული, როგორც საქართველოზე“, – აღნიშნა მარიამ ქვრივიშვილმა.
The National Geographic Traveller Food Festival-ზე 50-მდე ორგანიზაცია და კომპანია, 60-მდე შეფი, სპიკერი და ავტორი მონაწილეობდა მთელი მსოფლიოდან. ფესტივალს ათასობით სტუმარი ჰყავდა.