ლატვიის ტელევიზიის ინფორმაციით, საკვების მიწოდების სამსახურის კურიერებზე რასისტული თავდასხმების შესახებ პოლიცია იშვიათად იღებს შეტყობინებებს. ვიდრე დაზარალებულები ბულინგის ქვეშ არიან, რასისტული სუბკულტურის მქონე კრიმინალური პირები თავისუფლად საქმიანობენ. თუმცა, პოლიციამ რამდენიმე დამნაშავე უკვე დააკავა.
ლატვიაში, ცოტა ხნის წინ, „ეროვნული, ეთნიკური და რასობრივი სიძულვილის წაქეზებისთვის, ასევე დანაშაულის შეუტყობინებლობისთვის“, 7 სკინჰედი დააკავეს. მათი საქმის წინასწარი გამოძიება გრძელდება.
გამოძიების დროს სკინჰედების სახლებში აღმოაჩინეს ცეცხლსასროლი იარაღის ანალოგიური ნივთები, დიდი რაოდენობით საბრძოლო მასალა, სკინჰედების ტანსაცმელი, ასევე რუსეთის იმპერიის განმადიდებელი დროშა წარწერით: „ჩვენ რუსები ვართ, ღმერთი ჩვენთანაა“. ჯგუფი თავს დაესხა საკვების მიმტან კურიერებს, დაამცირა ისინი და ფიზიკურად გაუსწორდა.
„ყველა ეს თავდასხმა მობილური ტელეფონით არის გადაღებული და შესაბამისი ვიდეოები ინტერნეტში გამოქვეყნდა. თავდასხმები განხორციელდა იმის გამო, რომ მათი სუბკულტურის თანახმად, ლატვიაში მხოლოდ თეთრკანიანები, ანუ ღია ფერის ადამიანები უნდა ცხოვრობდნენ“, – აცხადებს რიგის სახელმწიფო პოლიციის კრიმინალური პოლიციის დეპარტამენტის ხელმძღვანელი, არვის იეშკინსი.
გასულ კვირას დაკავებულთა შორის 6 არასრულწლოვანი და 1 ზრდასრული პირია. მათი უმეტესობა ახლა პატიმრობაშია, ისევე როგორც გაზაფხულზე დაკავებულები.
„მიმდინარე წლის 20 აპრილს სკინჰედების ჯგუფის ლიდერი დააკავეს და მის წინააღმდეგ აღძრული სისხლის სამართლის საქმე, ბრალის წაყენების მიზნით, პროკურატურას გადაეცა. ეს პირი ჯერ კიდევ პატიმრობაშია“, – განაგრძობს იეშკინსი.
ასევე მიმდინარეობს იმის გარკვევა, იყო თუ არა ერთმანეთთან კავშირში სკინჰედთა სხვადასხვა ჯგუფი.
ვეფის (VEF) და ჩიეკურკალნსის რაიონებში შეხვედებით ადამიანებს ისეთი ატრიბუტიკით და ნიშნებით, რომლებითაც ჰიტლერს მიაგებენ პატივს. რასისტული თავდასხმები განხორციელდა რიგის ცენტრში, ვერმანის ბაღში, ძველ ქალაქში, სუპერმარკეტებსა და ცენტრალურ სადგურზე, ასევე პურვციემსში.
რასისტები მსხვერპლს ელოდებიან რესტორნებთან, სადაც კურიერები კლიენტისთვის მისაწოდებელ საკვებს იღებენ, ან იმ კორპუსებთან, სადაც მომხმარებლები ცხოვრობენ.
ეს ამბავი კი შეემთხვა კურიერს, რომელმაც ვინაობის გამხელა არ ისურვა, მაგრამ დათანხმდა, მოეყოლა, რაც თავს გადახდა.
„კიბეებს რომ მივუახლოვდი, ჩემს უკან რაღაც ხმაური მომესმა. უფრო სწორედ, მესმოდა, ადამიანების ჯგუფი რომ მოძრაობდა. შემოვბრუნდი და დავინახე, დაახლოებით 10 ახალგაზრდა ჩემსკენ მოიწევდა. როცა დარწმუნდნენ, თეთრკანიანი ვიყავი, ერთმანეთს მიმართეს – არა, ბიჭებო! ეს ჩვენიანია, წავედით… შებრუნდნენ და გაიქცნენ“, – თქვა მან.
კითხვაზე, რა ენაზე საუბრობდნენ თავდამსხმელები, კურიერმა უპასუხა, რომ ისინი რუსულენოვანი პირები იყვნენ. სიბნელეში მათი სახეები ვერ გაარჩია, მაგრამ სკინჰედების ტანსაცმელში ჩაცმული ახალგაზრდები პურვციემსში ხშირად უნახავს.
„ბევრჯერ მინახავს ისინი პურვციემში. ისინი აქაც ვნახე. ინციდენტის შემდეგ ყველა კურიერს მოვუყევი, რაც მოხდა და ვურჩიე, ფრთხილად ყოფილიყვნენ. იმიტომ, რომ შეიძლება თავში მოხვდეთ“, – ამბობს ინკოგნიტო კურიერი.
ლატვიაში სკინჰედების მხარდამჭერების რაოდენობის დასახელებისგან პოლიცია თავს იკავებს.
„ახლა არ გეტყვით, რამდენად ფართოდ არის გავრცელებული, მაგრამ ის კი მინდა ხაზგასმით აღვნიშნო, რომ რადგან მათ უმრავლეობას არასრულწლოვნები შეადგენენ, მშობლებმა ყურადღება უნდა მიაქციონ მათ ქმედებებს და ჩვევებს, დროული რეაგირება მოახდინონ მათზე და თუ ეს ჩვევები უარყოფითია – დროულად აღკვეთონ. და კიდევ ერთი: ნებისმიერ შემთხვევაში, შეუძლიათ დაუკავშირდნენ პოლიციას“, – ამბობს რიგის სახელმწიფო პოლიციის კრიმინალური პოლიციის დეპარტამენტის უფროსი.
„ისინი პოლიციაში არ მიდიან და არ ჩივიან, რადგან […] არ უნდათ ვინმეს გაბრაზება, არ უნდათ უსიამოვნებები, თუმცა ძალიან კანონმორჩილები არიან“, – ამბობს ლატვიის კულტურის აკადემიის მეცნიერ-თანამშრომელი და სოციალურ მეცნიერებათა დოქტორი, მაია სპურინია.
„და ძალიან მოკრძალებულები. ყოველ შემთხვევაში, ვისაც ვესაუბრეთ, მაგალითად, ინდოელებს, შრი-ლანკელებს – ასეთები ჩანან… შრი-ლანკელებს, რომლებიც ეკონომიკურად განადგურებული ქვეყნიდან ჩამოვიდნენ და აქ ყოფნა ძალიან მოსწონთ, არ უნდათ, პრობლემები შეექმნათ. მათ ურჩევიათ, ამ ყველაფერს გაუძლონ და სამწუხაროდ, პოლიციას არ აკითხავენ“, – დასძინა მან.