ეს არის საკვანძო სახელმწიფოებრივი საკითხი, იმიტომ რომ სხვა დროს ვერავინ გაბედოს საქართველოს წინააღმდეგ მოღალატეობრივი მოქმედებები, – ასე უპასუხა მამუკა მდინარაძემ კითხვას აგვისტოს ომის შესახებ გამოძიების მნიშვნელობაზე.
საპარლამენტო უმრავლესობის ლიდერმა და „ქართული ოცნების“ აღმასრულებელმა მდივანმა ოპოზიციის წარმომადგენლების განცხადებებსაც გამოეხმაურა, რომლებიც ამ გამოძიებას რუსულ საქმედ აფასებენ.
„ყველაზე პრიმიტიული პიარ კამპანია იმაში მდგომარეობს, რაც არ მოსწონთ, ყველაფერს რუსულს ეძახიან. ისეთივე რუსულია ეს გამოძიება, როგორი რუსულიც იყო გამჭვირვალობის კანონი. ზუსტად ეს არის, ერთი ერთში, იმიტომ რომ რაც არ მოსწონთ, რაც აზიანებთ, ააშკარავებთ, ყველაფერი მათთვის რუსულია.
ახლა რაც შეეხება იმას თუ რა არის რუსული და რა არის ქვეყნისთვის დამაზიანებელი. სამშობლოს ღალატის მუხლი თვეებით ადრე მათ ამოიღეს კანონიდან, სამხრეთ ოსეთის ავტონომიური ოლქი მათ აღადგინეს, საზღვრები მათ დაადგინეს, კოდორი და ზემო აფხაზეთის თემაც გვახსოვს. ამის შემდეგ მთელს მსოფლიოს აჩვენეს აქედან იქით დაბომბვის კადრები 7-ში, ამის შემდეგ ხელი მოაწერეს რეზოლუციას, სადაც ქართველ სამხედროებს დააბრალეს ომის დაწყება და კასეტური ბომბებით ცხინვალის დაბომბვა. ამის შემდეგ ტალიავინის დასკვნას დაეთანხმნენ და დღეს ლაპარაკობენ, რომ სხვისი ნაკეთები რამე საქმეა რუსული და ამ ყველაფრის გამოძიება არის თურმე რუსული.
ანუ, მათ შეუძლიათ ღალატი ჩაიდინონ, ქართველ სამხედროებს ომის დაწყება დააბრალონ და დაადანაშაულონ და ამაზე ხელი მოუწერონ, ამის შემდეგ ხელი მოაწერონ ამ რეზოლუციას, სადაც მე-11 პუნქტში ეწერა, რომ შესაძლოა ომის დანაშაული ჰქონდათ ქართველ სამხედროებს ჩადენილი – აი ეს ღალატი ჩაიდინონ და მერე სხვას ეძახონ რუსული საქმის მკეთებელი, იმიტომ რომ თურმე რუსები იქ რაღაცას თავისთვის ლაპარაკობენ და იყენებენ გაეროში რაღაცას. ანუ, შენ შეგიძლია ღალატი ჩაიდინო და თუ ღალატის გამოძიებაზე ვინმე კრინტს დაძრავს, ეს რუსული საქმეა.
მაგრამ ამავე დროს, მეორე ფაქტორიც არის აქ. ჩვენ სტრასბურგიც მოვიგეთ და ჰააგაც მოვიგეთ. და კრინტი არ დაგვიძრავს მაგალითად მე-11 პუნქტზე, სადაც ეწერა, რომ შესაძლო ომის დანაშაული თავად ქართველმა სამხედროებმა ჩაიდინესო. ამაზე ხმა არ ამოგვიღია. დღეს რუსებმა და „ნაცებმა“, რაც უნდათ ის იძახონ, ჰააგაც ჩავლილია და სტრასბურგიც ჩავლილია ჩვენ სასარგებლოდ – საქართველოს და ქართველი სამხედროების სასარგებლოდ. ახლა ილაპარაკონ, რაც უნდათ. ამ საქმეს მაინც გამოიძიებს სახელმწიფო“, – განაცხადა მდინარაძემ.