„NED-ის დაფინანსებული არასამთავრობო ორგანიზაციების მიზანი საქართველოში დესტაბილიზაციის გამოწვევა იყო“ – ასე ეხმაურებიან მმართველ გუნდში ჩინეთის საგარეო საქმეთა სამინისტროს მიერ მომზადებულ მწვავე ანგარიშს.
„ქართულ ოცნებაში“ ჩინეთის საგარეო უწყების მიერ გამოქვეყნებულ დოკუმენტში საქართველოს შესახებ მოყვანილი ფაქტები არ გაჰკვირვებიათ. მათი განმარტებით, „დემოკრატიის ეროვნული ფონდის” მიერ დაფინანსებული ქართული არასამთავრობო ორგანიზაციების საქმიანობა, ხშირ შემთხვევაში მიმართულია ქვეყანაში დესტრუქციის და არეულობის მოწყობისკენ. მმართველ გუნდში „ისფედის“ მაგალითი მოჰყავთ, რომელმაც 2020 წელს პარალელური დათვლის შედეგები გააყალბა და ოპოზიციას პარლამენტის ბოიკოტისა და ქუჩის აქციების ჩატარების საბაბი მისცა.
საპარლამენტო უმრავლესობაში აცხადებენ, რომ „დემოკრატიის ეროვნული ფონდი” „ორგანიზებული კრიმინალისა და კორუფციის გამოძიების პროექტს” და „საერთაშორისო გამჭვირვალობა – საქართველოს“ აფინანსებს, რომლებმაც „ქართული ოცნების“ საპატიო თავმჯდომარისა და მისი ოჯახის ქონების შესახებ ყალბი ინფორმაცია გაავრცელეს.
როგორც ცნობილია, ჩინეთის საგარეო საქმეთა სამინისტროს ანგარიშში დემოკრატიის ეროვნული ფონდის საქმიანობაზეა საუბარი და მიმოხილულია, თუ როგორ მოქმედებს ეს ორგანიზაცია ამერიკის ინტერესების შესაბამისად. ამავე ანგარიშში ნათქვამია, რომ NED-მა საქართველოში დააფინანსა 3 არასამთავრობო ორგანიზაცია, რათა გამჭვირვალობის კანონის წინააღმდეგ აქციები მოეწყოთ.