ისრაელის ავიადარტყმას ღაზის სექტორის დასავლეთ ნაწილში მდებარე სკოლაზე, რომელსაც იძულებით გადაადგილებული პირები აფარებდნენ თავს, ათი პალესტინელი ემსხვერპლა. ამის შესახებ ღაზის სექტორის სამოქალაქო თავდაცვა იტყობინება.
თავის მხრივ, ისრაელის თავდაცვის ძალებში აცხადებენ, რომ სკოლაში „ჰამასის“ მებრძოლების ბაზა იყო მოწყობილი.
ისრაელის ხელისუფლების განცხადებით, „ჰამასი“ მუსტაფა ჰაფეზის სკოლაში მოწყობილ სამეთაურო პუნქტს ისრაელსა და ღაზაში მისი სამხედრო დანაყოფების წინააღმდეგ თავდასხმების დასაგეგმად და განხორციელებისთვის იყენებდა.
როგორც ისრაელის თავდაცვის ძალებში აღნიშნავენ, მათ მრავალ ზომას მიმართეს, რათა დარტყმისას მოქალაქეებისთვის ზიანი შეემცირებინათ, მათ შორის მაღალი სიზუსტის საბრძოლო მასალების გამოყენებითა და სადაზვერვო საქმიანობით.
ისრაელელი სამხედროები აცხადებენ, რომ ტერორისტული ორგანიზაცია „ჰამასი“ სისტემატურად არღვევს საერთაშორისო სამართალს სამოქალაქო ობიექტებისა და მშვიდობიანი მოსახლეობის „ცოცხალ ფარად“ გამოყენებით.