ვენესუელის უზენაესმა სასამართლომ ნიკოლას მადურო სადავო საპრეზიდენტო არჩევნებში გამარჯვებულად გამოაცხადა. ინფორმაციას ამის შესახებ ამერიკული გამოცემა The Wall Street Journal-ი ავრცელებს.
უზენაესი სასამართლოს თავმჯდომარემ, კარისლია როდრიგესმა განაცხადა, რომ ოპოზიციის მიერ დათვლილი ხმები გაყალბებული იყო, თუმცა არ წარმოადგინა რაიმე მტკიცებულება.
მისი თქმით, სასამართლომ ჩაატარა საკუთარი გამოძიება არჩევნების შედეგებთან დაკავშირებით ნიკოლას მადუროს მოთხოვნით და დაადგინა, რომ ეროვნული საარჩევნო საბჭოს განცხადება მადუროს გამარჯვების შესახებ ზუსტი იყო.
ვენესუელაში საპრეზიდენტო არჩევნები 28 ივლისს ჩატარდა. ქვეყნის საარჩევნო ორგანომ ხმების 52%-ით გამარჯვებულად მოქმედი პრეზიდენტი ნიკოლას მადურო გამოაცხადა, რასაც ქვეყანაში საპროტესტო გამოსვლები მოჰყვა.
აქციების დროს დააკავეს 2 400-ზე მეტი ადამიანი. მასობრივი არეულობების შედეგად კი 23 ადამიანი დაიღუპა.