აშშ-ის ცენტრალური სარდლობის ძალებმა ერაყის უსაფრთხოების სამსახურთან ერთად დასავლეთ ერაყში ჩატარებული რეიდის შედეგად ტერორისტული ორგანიზაცია „ისლამური სახელმწიფოს“ 15 მებრძოლი მოკლეს. ინფორმაციას აშშ-ის ცენტრალური სარდლობა ავრცელებს.
ინფორმაციის თანახმად, „ისლამური სახელმწიფოს“ მებრძოლები ხელყუმბარებით, „შაჰიდის ქამრებით“ და მრავალი სხვა ცეცხლსასროლი იარაღით იყვნენ შეიარაღებულნი. რეიდის დროს მშვიდობიანი მოსახლეობა არ დაზარალებულა.
როგორც აშშ-ის ცენტრალური სარდლობა განმარტავს, აღნიშნული ოპერაცია „ისლამური სახელმწიფოს“ შესუსტებას ემსახურებოდა, რათა ტერორისტებს ერაყის მშვიდობიან მოსახლეობაზე, აშშ-ის მოქალაქეებზე, მის მოკავშირეებსა და პარტნიორებზე თავდასხმების შესაძლებლობა არ ჰქონოდათ.
„ისლამური სახელმწიფო“ რეგიონისთვის, ამერიკის მოკავშირეებისთვის საფრთხეს წარმოადგენს. აშშ-ის ცენტრალური სარდლობა, ერაყისა და კოალიციურ ძალებთან ერთად მომავალშიც გააგრძელებს ტერორისტების აღმოჩენასა და განადგურებას, დასძინეს ამერიკის ცენტრალურ სარდლობაში.