გიგამ ჯერ კიდევ ასპარეზობის დროს აჩვენა, რომ კონკურენტი არ ჰყავს და თავის სახეობაში არის მსოფლიოში პირველი, – აღნიშნა ადამიანის უფლებათა დაცვისა და სამოქალაქო ინტეგრაციის საპარლამენტო კომიტეტის თავმჯდომარემ რატი იონათამიშვილმა.
„მან რეკორდით მოიგო, მაგრამ ჩვენ შემდეგ სამწუხაროდ ამ სიმართლის დამტკიცება მოგვიწია. აქ სასამართლოში მრავალსაათიანი პროცესის შემდეგ ჩვენ შევძელით და გიგას უფლებები დავიცავით. გიგამ ფაქტობრივად ერთ დღეში ორჯერ აღნიშნა გამარჯვება, გიგასთან ერთად ჩვენც და მთელმა საქართველომ.
გიგას ჩემპიონობას სულ სხვა ფასი აქვს. მე დარწმუნებული ვარ, ეს გადამდები იქნება მთლიანად ჩვენი პარანაკრებისთვის. შემდეგი გაჩერება არის უკვე ეტლით მოფარიკავეების, ვისაც შეუერთდებიან პარაწოლჭიმის და პარაძიუდოს ნაკრებები“, – განაცხადა რატი იონათამიშვილმა.
მსოფლიოს მოქმედმა ჩემპიონმა, ქართველმა მძლეოსანმა გიგა ოჩხიკიძემ ბირთვის კვრაში კვლავ ჩემპიონობა იზეიმა და საქართველოს პარალიმპიადაზე ოქროს მედალი მოუტანა.