“ევროკავშირის ქვეყნებში, ბოლო წლებში ათობით პარტია აიკრძალა და ეს ჩვეულებრივი პროცესია”

როდესაც კონკრეტული პარტია არაკონსტიტუციურია, ემსახურება სახელმწიფოსთვის ძირის გამოთხრას, უნდა აიკრძალოს, – განაცხადა ფრაქცია „ქართული ოცნების“ თავმჯდომარის მოადგილემ ლევან მაჭავარიანმა.

მისი თქმით, ეს ჩვეულებრივიო პროცესია და ასეთი პრაქტიკა არსებობს ევროკავშირის ქვეყნებშიც.

„ორმაგ სტანდარტთან გვაქვს საქმე. როდესაც ჩვენ ვსაუბრობთ, რომ „ნაციონალური მოძრაობის“ რეჟიმი უნდა გასამართლდეს და აუცილებლად გასამართლდება იმ ტოტალიტარული რეჟიმის გამო და იმ დანაშაულის გამო თუ როგორც დაგვაკარგვინა ტერიტორიები, ამასთან დაკავშირებით ვისმენდით საყვედურებს უცხოელი პარტნიორებისგან – როგორ შეიძლებაო და მე შეგახსენებთ, რომ მაგალითად უკრაინის და მოლდოვას შემთხვევაში ბოლო ორი წლის განმავლობაში ფაქტობრივად აღარაა დარჩენილი ოპოზიციური მედია და პარტია. ევროკავშირის ქვეყნებსაც რომ გადავხედოთ, ათობით პარტია აკრძალა ბოლო წლების განმავლობაში. ეს ჩვეულებრივი პროცესია, როდესაც კონკრეტული პარტია არაკონსტიტუციურია, ემსახურება სახელმწიფოსთვის ძირის გამოთხრას, უნდა აიკრძალოს, იმას რა სიკეთე შემოაქვს, შემოაქვს მხოლოდ დესტრუქცია. იგივეა „ნაციონალური მოძრაობის“ შემთხვევაშიც“, – განაცხადა მაჭავარიანმა.

გაზეთ Welt am Sonntag-ის ინფორმაციით, ბუნდესტაგის რამდენიმე ფრაქცია საკანონმდებლო ინიციატივას ამზადებს, რომლის მიზანია მემარჯვენე პოპულისტური პარტიის „ალტერნატივა გერმანიისთვის“ აკრძალვა.