ისრაელის არმიამ, დაზვერვის მონაცემებზე დაყრდნობით, გამთენიისას ღაზის სექტორში დაჯგუფება „ჰამასის“ პოზიციებზე საჰაერო იერიში მიიტანა. ინფორმაცია ისრაელის თავდაცვის არმიის („ცაჰალის“) ტელეგრამ არხზეა გამოქვეყნებული.
„ცაჰალის“ მტკიცებით, „ჰამასის“ წარმომადგენლებს ღაზაში მდებარე ალ-ბურეიჯის სკოლაში სამეთაურო-საკონტროლო ცენტრი ჰქონდათ მოწყობილი. ისინი მას ისრაელზე და ებრაელ ჯარისკაცებზე თავდასხმებისთვის იყენებდნენ.
ისრაელის არმიის ინფორმაციით, იერიშის მიტანამდე გადაიდგა ნაბიჯები მშვიდობიან მოსახლეობაში მსხვერპლის მინიმიზაციის კუთხით, ზუსტი ჭურვების გამოყენების, საჰაერო მეთვალყურეობისა და დამატებითი სადაზვერვო ინფორმაციის ჩათვლით.
როგორც „ცაჰალში“ ამტკიცებენ, ეს არის „ჰამასის“ მიერ სამოქალაქო ინფრასტრუქტურის სამხედრო მიზნებისთვის გამოყენების კიდევ ერთი მაგალითი. ისრაელის თავდაცვის არმია გააგრძელებს „ჰამასთან“ ბრძოლას ებრაელი მოქალაქეების დაცვის მიზნით.