ნატოს ყოფილი გენერალური მდივანი იენს სტოლტენბერგი თვლის, რომ უკრაინის გაწევრიანება ნატოში შესაძლებელია იმ შემთხვევაშიც კი, როცა რუსეთს მისი ტერიტორიები ოკუპირებული აქვს. ინფორმაციას Financial Times-ი ავრცელებს.
მისი თქმით, არსებობს საშუალებები, რითაც ნატოს ხელშეკრულების მეხუთე პუნქტის, რომლის თანახმადაც, ალიანსის ერთ სახელმწიფოზე თავდასხმა ყველა წევრ ქვეყანაზე შეტევად აღიქმება, პრობლემას უკრაინის შემთხვევაში გადაჭრის.
„ამ პრობლემის მოგვარების ხერხი არსებობს“, – განაცხადა მან.
„კვლავ ვიტყვი, შედარება ძალიან სახიფათოა, იმიტომ რომ არცერთი პარალელი 100%-ით არ ემთხვევა ერთმანეთს, თუმცა შეერთებული შტატები იაპონიას უსაფრთხოების გარანტიას აძლევს. მაგრამ ეს გარანტიები არ ვრცელდება კურილის კუნძულებზე, რომელსაც იაპონია საკუთარ ტერიტორიებად მიიჩნევს, თუმცა მათ რუსეთი აკონტროლებს“, – დასძინა სტოლტენბერგმა.
გარდა ამისა, მან დასავლეთ გერმანიის მაგალითიც მოიყვანა, რომელიც აღმოსავლეთ გერმანიას დიდი გერმანიის ნაწილად მიიჩნევდა. „მათ აღმოსავლეთ ბერლინში საელჩოც არ ჰქონდათ, მაგრამ ნატო, რა თქმა უნდა, მხოლოდ დასავლეთ გერმანიას იცავდა. როცა არსებობს ნება, პრობლემის გადაჭრის გზებიც არსებობს“, – აღნიშნა ნატოს ყოფილმა გენმდივანმა.