”ჩვენ ცოდნა გვიცავს! გვიცავს სიცრუისგან, სიყალბისგან, მანიპულირებისგან!”

გასულ წელს მე მხარი დავუჭირე პრემიერის ოთხ ინიციატივას, მათ შორის განათლების სფეროს ფუნდამენტური რეფორმირების იდეას და 2017 წელი განათლების წლად გამოვაცხადე, –  აღნიშნული განცხადება პრეზიდენტმა პარლამენტის ტრიბუნიდან, ყოველწიური მოხსენებით გამოსვლისას გააკეთა.
გიორგი მარგველაშვილმა ხაზგასმით აღნიშნა, რომ განათლება თავისუფლების წინაპირობაა და განათლებულ ადამიანს ვერც პროპაგანდა დააბნევს და ვერც ხელოვნური საფრთხობელა დააშინებს.
პრეზიდეტმა მმართველ გუნდს საგანმანათლებლო ინიციატივებისა და რეფორმების განხორციელებაში მხარდაჭერა აღუთქვა.
”გასულ წელს მე მხარი დავუჭირე პრემიერის ოთხ ინიციატივას, მათ შორის განათლების სფეროს ფუნდამენტური რეფორმირების იდეას და 2017 წელი განათლების წლად გამოვაცხადე. ამ წლების განმავლობაში სარეზერვო ფონდიდან ჩვენ ათეულობით პროექტი დავაფინანსეთ და სხვადასხვა პროექტის დაფინანსებას წელსაც გავაგრძლებეთ. მიგულეთ თქვენს პარტნიორად საგანმანათლებლო ინიციატივებსა და რეფორმებში, რადგანაც ქვეყანაში არსებული ყველა პრობლემა, რეალურად სწორედ განათლებასთან არის დაკავშირებული. განათლება დაცულობის გარანტიაა. ჩვენ ცოდნა გვიცავს! გვიცავს სიცრუისგან, სიყალბისგან, მანიპულირებისგან! განათლება თავისუფლების წინაპირობაა. განათლებული და მოაზროვნე ადამიანი იაზრებს თავის არჩევანს და იცავს თავის უფლებებს. განათლებულ ადამიანს ვერც პროპაგანდა დააბნევს და ვერც ხელოვნური საფრთხობელა დააშინებს. განათლება და სახელმწიფოებრივი აზროვნება პირდაპირ კავშირშია ერთმანეთთან. მხოლოდ მაშინ შეგიძლია დაიცვა საკუთარი და ქვეყნის თავისუფლება, როდესაც იაზრებ ღირებულებებს როგორც მოქალაქე, როგორც შენი ერის შვილი, როგორც შენი ერის მეხსიერების მატარებელი. როდესაც იცი ვინ იყავი, ფიქრობ იმაზე, ვინ იქნები ხვალ და შესაბამისად, როგორ უნდა მოიქცე დღეს იმისთვის, რომ არ უღალატო საკუთარ დანიშნულებას და იყო ნამდვილად თავისუფალი”, – განაცხადა გიორგი მარგველაშვილმა.