აშშ-ის ხელისუფლება უკრაინის პრეზიდენტს ვოლოდიმირ ზელენსკის რუსეთის შეჭრამდე რამდენიმე დღით ადრე პარტიზანული ომისთვის მომზადებას სთავაზობდა, – განაცხადა ჟურნალ Time-ის ჟურნალისტმა, ზელენსკის ბიოგრაფიული წიგნის, „შოუმენის“ ავტორმა საიმონ შუსტერმა.
მისი თქმით, ზელენსკის აშშ-ის ხელისუფლების გზავნილი ამერიკის ვიცე-პრეზიდენტმა კამალა ჰარისმა გადასცა მიუნხენის უსაფრთხოების კონფერენციაზე, რომელიც 2022 წლის თებერვალში, რუსეთის შეჭრამდე რამდენიმე დღით ადრე ჩატარდა.
„მესიჯი იყო მარტივი: „ომი მოდის და თქვენ წააგებთ“. ასეთი იყო სცენარი. ხოლო ზელენსკი უნდა მომზადებულიყო, რათა მის მთავრობას დევნილობაში ემუშავა. საჭირო იყო ჯარის ისე მომზადება, რომ უკრაინას პარტიზანული ომის წარმოება შესძლებოდა“, – განაცხადა შუსტერმა უკრაინულ დოკუმენტურ ფილმში „USA-UA: თეთრი სახლის საიდუმლო ფაილები“.
აშშ-ის პრეზიდენტის ყოფილმა მრჩეველმა უსაფრთხოების საკითხებში ჯონ ბოლტონმა კი ამავე ფილმში განაცხადა, რომ ამერიკის სამხედრო ხელმძღვანელობა კონგრესის წევრებს საიდუმლო ბრიფინგებს უტარებდა, საიდანაც შემდეგ გაირკვა, რომ ამერიკელები ფიქრობდნენ, კიევი რუსეთის შეჭრიდან რამდენიმე დღეში, ხოლო მთლიანი უკრაინა რამდენიმე კვირაში დაეცემოდა.