საქართველოს პარლამენტის თავმჯდომარემ ირაკლი კობახიძემ პარლამენტის პლენარულ სხდომაზე განაცხადა, რომ როცა პრეზიდენტის ადმინისტრაციის საჯარო მოხელეებს გაურბით სიტყვა, ეს ნიშნავს, რომ პრეზიდენტს გაურბის სიტყვა. მან იმედი გამოთქვა, რომ შეიცვლება პრეზიდენტის და მისი ადმინისტრაციის მიდგომა კონსტიტუციური ინსტიტუტების მიმართ.
„ასეთ დროს საქართველოს პრეზიდენტი არ უნდა იყოს განხეთქილების ხელშემწყობი პოლიტიკურ სისტემაში. ჩვენ, სამწუხაროდ, ვხედავთ საპირისპირო ტენდენციას – რეალურად პრეზიდენტის მხრიდან წარიმართება პროცესები, რომელიც ხელს უწყობს ორი ბანაკის ჩამოყალიბებას. ეს არის ის რეალობა, რომელიც გვაქვს სახეზე და ეს არის ძალიან ცუდი. ჩვენ ასევე ვხედავთ დაპირისპირებას კონკრეტულ ინსტიტუტებთან და ესეც არ არის შესაბამისობაში იმ კონსტიტუციურ როლთან, რომელიც არის გაწერილი პრეზიდენტისთვის. ხშირად გვესმის არაკორექტული გამონათქვამები, რაც ბუნებრივია, ჩვენთვის არის მიუღებელი განსაკუთრებით პრეზიდენტის მხრიდან. ერთხელ სატელევიზიო ჩართვისას აღნიშნა ბატონმა პრეზიდენტმა, რომ მას არასდროს გაქცევია სიტყვა, თუმცა, მე ერთი რამ შემიძლია გითხრათ – როდესაც პრეზიდენტის ადმინისტრაციის საჯარო მოხელეებს გაურბით სიტყვა და ძალიან მძიმე ფორმით გაურბით სიტყვა, ეს იმას ნიშნავს, რომ პრეზიდენტს გაურბის სიტყვა. ამიტომ საუბარს იმაზე, რომ ჩვენ არ გაგვირბის სიტყვა, სჯობს, მართლა არ გაგვექცეს სიტყვები და ვიყოთ კორექტულები როგორც ჩვენი კოლეგების, ასევე სხვა კონსტიტუციური ინსტიტუტების მიმართ”, – განაცხადა ირაკლი კობახიძემ.