იერუსალიმში, ისრაელის პრემიერ-მინისტრის, ბენიამინ ნეთანიაჰუს სახლთან ათასობით დემონსტრანტი შეიკრიბა.
აქციის მონაწილეები თავდაცვის მინისტრის, იოავ გალანტის გათავისუფლების გამო ბენიამინ ნეთანიაჰუს გადადგომას ითხოვენ. აქტივისტები სკანდირებენ: „ნეთანიაჰუ ტირანი“; „ნეთანიაჰუ მოღალატე“.
დემონსტრანტები პრემიერ-მინისტრის სახლთან მიახლოებას ცდილობდნენ, რა დროსაც პოლიციასა და აქციის მონაწილეებს შორის შეტაკებები მოხდა. ადგილზე მობილიზებულია წყლის ჭავლის მანქანებიც.
პარალელურად, აქციები მთელი ქვეყნის მასშტაბით იმართება, მათ შორის თელ ავივში, ჰაიფაში, ნეთანიასა და ბერშებაში.
ცნობისთვის, ისრაელის პრემიერ-მინისტრმა, ბენიამინ ნეთანიაჰუმ ქვეყნის თავდაცვის მინისტრი იოავ გალანტი თანამდებობიდან დღეს გაათავისუფლა. მას ისრაელის საგარეო საქმეთა მინისტრი ისრაელ კაცი შეცვლის.