პარტნიორობა გვესმის იმ ჭრილში, რომ აუცილებლად უნდა მოისმინონ, გაიზიარონ ყველა ის გამოწვევა, რომელიც ჩვენს ქვეყანას აქვს და რომელმაც შექმნა საჭიროება ქვეყანაში მიგვეღო სამართლებრივი რეგულაციები, – განუცხადა ჟურნალისტებს საქართველოს საგარეო საქმეთა მინისტრმა ილია დარჩიაშვილმა ევროკავშირის 8 ქვეყნის საგარეო საქმეთა საპარლამენტო კომიტეტების თავმჯდომარეების საქართველოში ვიზიტზე.
მისივე თქმით, საქართველოს ხელისუფლებას ყოველთვის აქვს მზაობა, ღიაობა კონსტრუქციული დიალოგისთვის და არა მიკერძოებული დიალოგისთვის.
„ჩვენ პარტნიორობა გვესმის იმ ჭრილში, რომ ჩვენმა პარტნიორებმა აუცილებლად უნდა მოისმინონ, გაიზიარონ ყველა ის გამოწვევა, რომელიც ჩვენს ქვეყანას აქვს და რომელმაც შექმნა საჭიროება იმის, რომ ჩვენს ქვეყანაში მიგვეღო ის სამართლებრივი რეგულაციები. ამიტომ, დარწმუნებული ვარ, ჩვენი პარტნიორები ადრე თუ გვიან მიხვდებიან, დარწმუნდებიან იმაში, რომ მსგავსი ტიპის ინტერვენციები, მსგავსი ტიპის მიკერძოებული დამოკიდებულება და მსგავსი ტიპის უპატივცემულობა, ხშირ შემთხვევაში, როდესაც ვხედავთ და გვესმის, მიუღებელია ჩვენთვის.
ყოველთვის გვაქვს მზაობა, ღიაობა კონსტრუქციული დიალოგისთვის და არა მიკერძოებული დიალოგისთვის. გვყავს ძალიან ბევრი პარტნიორი, რომელიც ყოველთვის მზად არის მოისმინოს ჩვენი არგუმენტები და ეს არის გზა, რომელიც აუცილებლად მიგვიყვანს იქამდე, რომ ჩვენს პარტნიორებთან ურთიერთ, სტრატეგიული ინტერესების პატივსაცემ პოლიტიკას უფრო მეტად შევუწყობთ ხელს, რომელიც ყველასთვის სასარგებლოა“, – აღნიშნა ილია დარჩიაშვილმა.