“ქართული ოცნება“ მყარად დგომითა და სუვერენიტეტის დაცვით მიიწევს წინ იმ დასავლური ღირებულებებისაკენ, რომელიც დაავიწყდა მიხაილ როთს და მის მეგობრებს”

ეს არის ქვეყნის სუვერენიტეტის ფეხქვეშ გათელვა და ყველაზე არამეგობრული ნაბიჯი, – ასე შეაფასა ოპოზიციის აქციაზე 8 ევროპული ქვეყნის პარლამენტის წარმომადგენლების მისვლა საპარლამენტო ფრაქცია „ქართული ოცნების“ თავმჯდომარის პირველმა მოადგილე არჩილ გორდულაძემ.

„თითქოს ამ ქვეყანაში კონსტიტუცია გაუქმებულია, აღარც გაეროს წესდება არსებობს, აღარ ქვეყნების სუვერენიტეტი და ქვეყანათა შორის თანასწორობა და ვიღაცების დაკრულზე უნდა იცეკვოს თურმე ქვეყანამ. ეს რომ მიუღებელია ქართველი ხალხისთვის, ამიტომ მიიღო მილიონ ას ოც ათას ადამიანზე მეტი მხარდაჭერა „ქართულმა ოცნებამ“, რომელიც მყარად დგომითა და სუვერენიტეტის დაცვით მიიწევს წინ იმ დასავლური ღირებულებებისაკენ, რომელიც დაავიწყდა მიხაილ როთს და მის მეგობრებს“, – აღნიშნა გორდულაძემ.

რადიკალური ოპოზიციის აქციაზე მიხაილ როთი ევროკავშირის საპარლამენტო დელეგაციის სხვა წევრებთან ერთად მივიდა.