ეს ადამიანები ქართველი ხალხის მეგობრები არ არიან. ისინი არიან მიხეილ სააკაშვილის მეგობრები და პირდაპირ განაცხადეს, როდესაც ანტისამთავრობო მიტინგზე წარდგნენ, – განაცხადა „დღის ქრონიკაში“ იურიდიულ საკითხთა საპარლამენტო კომიტეტის თავმჯდომარის პირველმა მოადგილემ დავით მათიკაშვილმა.
მათიკაშვილი რადიკალური ოპოზიციის აქციაზე ევროკავშირის წევრი ქვეყნების პარლამენტის წევრების მისვლას გამოეხმაურა.
„ეს [ევროპელი დეპუტატების განცხადებები] არის ჩვენი ქვეყნის მიმართ ძალიან არამეგობრული ნაბიჯების კასკადი, რომელიც უკვე სცილდება განმარტებას – არამეგობრული და შესაძლოა უფრო ღრმად, მტრულ განმარტებებშიც გადადიოდეს. ასე უხეშად ჩარევა, ხელის ფათური უცხო ქვეყნის შიდა პოლიტიკურ საქმეებში სხვა მეტი არაფერია, თუ არა მტრობის და არაკეთილგანწყობის მკაფიო გამოვლენა. საინტერესოა, რას ფიქრობს ეს ხალხი… 8 ქვეყნის 8 პარლამენტის წევრი რას ეუბნება მილიონ ას ოცი ათას ქართველს, რომლებმაც ხმა მისცეს „ქართულ ოცნებას“, მშვიდობას, ევროპულ გზას და ვისი სურვილითაც საქართველოში სულ მალე პარლამენტის ახალი სხდომა გაიმართება და ქვეყანას ეყოლება საკანონმდებლო ორგანო, შემდეგ უკვე მთავრობა?!
ჩვენ მკაფიოდ მოვისმინეთ ეუთო/ოდირის დასკვნა, ევროკავშირიდან კონკრეტული განცხადებები მაღალი ტრიბუნებიდან და მთელმა მსოფლიომ გაიგო, რომ საქართველოში არჩევნები შედგა, ის იყო კონკურენტული და რომ ქვეყანას ეყოლება მთავრობა, რომელმაც შესაბამისი ნაბიჯები უნდა გადადგას. ეს ადამიანები ქართველი ხალხის მეგობრები არ არიან. ისინი არიან მიხეილ სააკაშვილის მეგობრები და პირდაპირ განაცხადეს, როდესაც ანტისამთავრობო მიტინგზე წარდგნენ“, – აღნიშნა მათიკაშვილმა.