11-12 მარტს ბათუმში განვითარებული მოვლენების ირგვლივ განხილვები გრძელდება. ბათუმის არეულობაში მონაწილეთა ერთი ნაწილი ხელს კვლავინდებურად აჭარის პოლიციის უფროსისკენ იშვერს. ამ პრეტენზიებს ყველაზე აქტიურად არასამთავრობო ორგანიზაცია „კორუფციასთან ბრძოლის საინფორმაციო ცენტრის“ ხელმძღვანელი მერაბ ღოღობერიძე აჟღერებს, რომელიც ერთ-ერთი მთავარი ორგანიზატორი გახლდათ ბათუმში განვითარებული მოვლენებისა.
აჭარის პოლიციის უფროსმა მის მიმართ გამოთქმული ბრალდებების შესახებ დეტალური ჩვენება 16 მარტს მისცა. მოგვიანებით გაირკვა, რომ კახა ბუხრაძის ჩვენებაში ფიგურირებს მერაბ ღოღობერიძის სახელიც, რომელსაც პოლიციის უფროსი მასთან უკანონო გარიგების მცდელობაში ადანაშაულებს.
ჩვენებაში ბუხრაძე ამბობს, რომ როდესაც იგი პოლიციის უფროსად დაინიშნა, მას ღოღობერიძე შეხვდა და სთხოვა, რომ მისთვის პატრულს პრობლემები არ შეექმნა, რადგან არ აქვს მართვის მოწმობა. ასევე, მერაბ ღოღობერიძე სარფის საბაჟოზე ტრაილერების ურიგოდ გატარებას ითხოვდა.
თავად ღოღობერიძე ამბობს, რომ აჭარის პოლიციის მთავარი სამმართველოს უფროსმა მიცემულ ჩვენებაში იცრუა. მისი თქმით, კახა ბუხრაძესთან შეხვედრის დროს მან „ნაციონალური მოძრაობის“ დეპუტატების ადმინისტრაციული წესით დაკავებასთან დაკავშირებით ისაუბრა.
„როდესაც „ნაციონალური მოძრაობის“ დეპუტატების დაკავება განხორციელდა, ეს ჩემთვის მიუღებელი იყო, რადგან დეპუტატების ადმინისტრაციული წესით დაკავება და იზოლატორში გადაყვანა არასწორია, თუ რამე მძიმე გარემოება არ არსებობს. ადმინისტრაციული წესით დაკავებული დეპუტატები არსად გაიქცეოდნენ. ერთ-ერთი შეხვედრის დროს კახა ბუხრაძეს სწორედ ამაზე ვესაუბრე, თუმცა ეს კახა ბუხრაძის ჩვენებაში არ არის ასახული. მან ეს დამალა და ამიტომ ვითხოვ გასაჯაროებას. კიდევ ერთხელ ვაცხადებ, რომ კახა ბუხრაძის ხელახლა დაკითხვა მოხდეს, ასევე, გასაჯაროვდეს ის მეოთხე პიროვნება, რომელიც ჩვენი შეხვედრის დროს იქ იმყოფებოდა. იგი მაღალი თანამდებობის პირია და, სამწუხაროდ, ვერ დავასახელებ“, – აცხადებს მერაბ ღოღობერიძე.
ვინ არის მერაბ ღოღობერიძე და რატომ ხვდება ის ყოველთვის სამართალდამცავების სამიზნე? აჭარის პოლიტიკურ წრეებში მის შესახებ საკმაოდ ბევრს საუბრობენ. ღოღობერიძე წარსულში კახა კუკავას პარტიის, „თავისუფალი საქართველოს“ წევრი იყო. ამჟამად ის არასამთავრობო ორგანიზაცია „კორუფციასთან ბრძოლის საინფორმაციო ცენტრს“ ხელმძღვანელობს და საკმაოდ ხშირად მონაწილეობს საპროტესტო აქციებში. 2016 წელს ის აქციებს მართავდა საკონსტიტუციო სასამართლოს ყოფილი თავმჯდომარის, გიორგი პაპუაშვილის წინააღმდეგ. ამავე წელს, სარფის საბაჟოზე ფეხსაცმელი ესროლა „ერთიანი ნაციონალური მოძრაობის“ წევრს, ლევან ვარშალომიძეს, რის გამოც, ადმინისტრაციული სამართალდარღვევისთვის დააკავეს.
თუმცა ეს არ ყოფილა ერთადერთი შემთხვევა, როდესაც ღოღობერიძე სამართალდამცავებმა დააკავეს. როგორც გავარკვიეთ, 2013 წლიდან დღემდე წვრილმანი ხულიგნობისა და პოლიციის მოთხოვნისადმი დაუმორჩილებლობაზე 14-ჯერ არის ადმინისტრაციული წესით სახდელდადებული, მათ შორის სხვადასხვა სახის საპროტესტო აქციებზე ძალადობრივი ქმედებების გამო. ჩვენი წყაროს მიერ დადასტურებული ინფორმაციით, მერაბ ღოღობერიძის მიმართ სისხლის სამართლის საქმეც იყო აღძრული, თუმცა დაზარალებულთან მორიგების გამო, გამოძიება შეწყდა. თავად ღოღობერიძე ამბობს, რომ ამ ფაქტთან მას კავშირი არა აქვს და „სავარაუდოდ, მის მოგვარე, სხვა მერაბ ღოღობერიძეში გვეშლება“.
„პრაიმტაიმი“ მის მიმართ გავრცელებულ ინფორმაციებზე განმარტების გასაკეთებლად მერაბ ღოღობერიძეს დაუკავშირდა და შეეცადა, პირადად მასთან გაერკვია, რამდენად ხშირად და რა მიზეზით აკავებენ მას სამართალდამცავები, როგორც ადმინისტრაციული, ისე სისხლის სამართლის წესით. ხომ არ უკავშირდებოდა მის მიერ 11-12 მარტს ორგანიზებული გამოსვლა პოლიციისადმი პირად უკმაყოფილებას და ჰქონდა თუ არა პოლიციის უფროსთან უკანონო გარიგების მცდელობა?
მერაბ ღოღობერიძე, „კორუფციასთან ბრძოლის საინფორმაციო ცენტრი“:
– ამ ფაქტებზე რამდენიმე დღის წინ დავიკითხე. ეს იყო პირადად ჩემი მოთხოვნა. ტრაილერის თაობაზე, მე, როგორც არასამთავრობო ორგანიზაციას, მომმართა ერთ-ერთმა მოქალაქემ დახმარებისთვის. ეს დოკუმენტაციაც გავასაჯაროვე. გარკვეული ვადებია დაწესებული, რის შემდეგაც ტრაილერს უწევს უკან მიბრუნება და ხელახლა თანხის გადახდა ქვეყანაში შემოსვლაზე. მოქალაქე აცხადებდა, რომ მან ამ ვადაში ვერ მოახერხა საზღვარზე გადასვლა, რადგან სარფის საბაჟოზე რიგებია, ამის გამო უწევდა ხელახლა თანხის გადახდა. მე მოქალაქის თხოვნის საფუძველზე მივმართე კახა ბუხრაძეს და ვთხოვე, დახმარება გაეწია. მან გადამამისამართა თავის მოადგილესთან, რომელიც არ შემხვდა და ამით დასრულდა ეს ისტორია.
– და არც ხელშეუხებლობას ითხოვდით საპატრულო პოლიციისგან, მართვის მოწმობის არარსებობის გამო?
– რა თქმა უნდა, არა. კახაბერ ბუხრაძის დანიშვნიდან დღემდე ჩემი საკუთარი მანქანა არ მყოლია. ყველა პიროვნებას აჩერებდნენ, ხელისუფლების წარმომადგენლებით დაწყებული, ბიზნესმენებით დამთავრებული, მაგრამ მე პირადად არასდროს გავუჩერებივარ პატრულს. შესაბამისად, ეს პრობლემა საერთოდ არ მქონია და ცხადია, არც ვთხოვდი ხელშეუხებლობას, მით უმეტეს, რომ ავტომობილიც არ მყავს.
– ანუ პირადად თქვენ პოლიციის მხრიდან პრობლემები არ შეგქმნიათ?
– მეც და უამრავ სხვა ადამიანსაც ჰქონდა და აქვს პრობლემები. სწორედ მაგიტომაც ვითხოვთ ბუხრაძის გადადგომას. რაც შეეხება კონკრეტულ პრობლემებს, დიახ, იგივე საპროტესტო აქციების დროს ხშირად ყოფილა ადმინისტრაციული წესით დაკავების ფაქტები, თუმცა დამოუკიდებელი სასამართლოს პირობებში, ხშირ შემთხვევაში გავმართლებულვარ. მაგალითად, საგზაო დეპარტამენტის უფროსის კაბინეტში გავმართე საპროტესტო აქცია, რის გამოც ადმინისტრაციული წესით დამაკავეს, მაგრამ სასამართლომ გამამართლა.
– გარდა ადმინისტრაციული პასუხისმგებლობისა, თქვენ მიმართ აღძრული იყო თუ არა საქმე სისხლის სამართლის წესით?
– არა, არასდროს.
– თუმცა, ჩვენი ინფორმაციით, 2013 წელს ხელვაჩაურში მოხდა ინციდენტი, სადაც თქვენ მიმართ დაიწყო გამოძიება 137-ე მუხლით (გაუპატიურება) და მალევე დასრულდა მხარეთა მორიგებით…
– მერაბ ფარტენაძე არის კიდევ ერთი პიროვნება. ის არის ჩემი მოსახელე და მოგვარე, თქვენ მასში გეშლებით. იყო რაღაც საუბარი, მაგრამ მე მასთან არანაირი კავშირი არ მაქვს და საერთოდ, არც კი ვიცნობ.
P.S. მიუხედავად იმისა, რომ მერაბ ღოღობერიძე გახლდათ ერთ-ერთი, ვინც ბათუმში განვითარებულ მოვლენებს უწევდა ორგანიზებას, გამოძიებას ამჯერად მისთვის ბრალი არ წარუდგენია. ამ ეტაპზე სისხლის სამართლის პასუხისგებაში მიეცა სულ 19 პირი, მათგან 18 წინასწარ პატიმრობაში, ერთი პირი კი გირაოს სანაცვლოდ გაათავისუფლეს, მისი არასრულწლოვნობიდან გამომდინარე. ადმინისტრაციული წესით კი სულ 80-მდე პირი მიეცა პასუხისგებაში. ღოღობერიძე კვლავ პოლიციის უფროსის გადადგომას ითხოვს, აჭარის პოლიტიკურ კულუარებში კი ამბობენ, რომ მის უკან გარკვეული ძალები დგანან და არამხოლოდ ოპოზიციიდან. აქედან გამომდინარე, ბათუმში მოვლენების შემდგომ ესკალაციასაც არ გამორიცხავენ.
www.primetime.ge