საქართველოს პრემიერმინისტრის, გიორგი კვირიკაშვილის ინფორმაციით, გაზაფხულზე, პროფესიულ სასწავლებლებში 8005-ზე მეტმა ახალგაზრდამ შეიტანა განაცხადი. ამის შესახებ პრემიერმა მთავრობის სხდომაზე განაცხადა.
“წელს გავააქტიურეთ პროფესიული განათლების პროგრამა და ძალიან სასიხარულოა, რომ დასრულდა რეგისტრაცია. 25%-ით მეტმა ადამიანმა მოინდომა ამ მიმართულებით სწავლა. 8005-ზე მეტმა მოსწავლემ შეიტანა განაცხადი. მოგეხსენებათ, გამომდინარე ამ მიმართულების პრიორიტეტულობიდან, სახელმწიფო მას სრულად აფინანსებს.
როგორც წესი, შემოდგომაზე არის ხოლმე სამჯერ მეტი, ვიდრე გაზაფხულის ნაკადზე. დასაქმების მაჩვენებელიც დღეს უკვე ძალიან მაღალია. ბევრი სასწავლებელია, სადაც 95%-ზე მაღალია დასაქმების მაჩვენებელი და ვფიქრობ, ამ მიმართულების წახალისება პირდაპირი გზაა დასაქმებისკენ. დამსაქმებლებიც ძალიან აქტიურად მონაწილეობენ პროფესიული განათლების პროგრამებში”,- აღნიშნა პრემიერმა.
საქართველოს განათლებისა და მეცნიერების სამინისტრომ პროფესიული განათლების მიღების მსურველთა რეგისტრაცია 27 მარტს გამოაცხადა. ყველა დაინტერესებულ პირს აქვს შესაძლებლობა, სახელმწიფოს სრული დაფინანსებით დაეუფლოს სასურველ პროფესიას ტურიზმის, მშენებლობის, სოფლის მეურნეობის, ტრანსპორტის, ინფორმაციული ტექნოლოგიებისა და სხვა მიმართულებებით.