როგორც კი სხდომა დაიხურა, მაშინვე ჩვენს ოპონენტებს გაუქრათ სურვილი მოეწყოთ მასკარადი და შოუ, შესაბამისად, პროცესი საქმიან ვითარებაში წარიმართა, – ამის შესახებ პარლამენტის იურდიულ საკითხთა კომიტეტის თავმჯდომარე ეკა ბესელიამ სამი კომიტეტის გაერთიანებული სხდომის დასრულების შემდეგ ჟურნალისტებს განუცხადა. სხდომაზე დეპუტატები სუს-ის 2016 წლის ანგარიშს ისმენდნენ.
მისი თქმით, ოპონენტებს ჰქონდათ შოუს მოწყობის სურვილი, თუმცა ეს არ გამოუვიდათ. „პროცესი საქმიან ვითარებაში წარიმართა, ყველა დასმულ კითხვაზე მივიღე პასუხი, ყველა საკითხზე რაზეც შეიძლებოდა უფრო მეტი გახსნა, ვიდრე ეს ანგარიშში წერია, მივიღეთ ინფორმაცია დახურულ ფორმატში. ჩვენი ოპონენტები, ემზადებოდნენ, რომ აქ შოუ მოეწყოთ და ეს შოუ ვერ მოაწყვეს, რა თქმა უნდა, იტყვიან იმას რაც მათ სურთ“, -განაცხადა ეკა ბესელიამ.
შეგახსენებთ, სახელმწიფო უსაფრთხოების სამსახურის 2016 წლის ანგარიშს პარლამენტის სამი კომიტეტის გაერთიანებულ სხდომაზე ისმენდნენ. ანგარიში ვახტანგ გომელაურის მოადგილემ, ალექსანდრე ტაბატაძემ წარადგინა.