მიხეილ ყაველაშვილი შეძლებს, რომ დაუბრუნოს ნდობა და ღირსება საპრეზიდენტო ინსტიტუტს, – ამის შესახებ „ხალხის ძალის“ აღმასრულებელმა მდივანმა, გურამ მაჭარაშვილმა განაცხადა.
როგორც მაჭარაშვილმა აღნიშნა, ყაველაშვილი დაიცავს ქვეყნის კონსტიტუციას, საქართველოს ინტერესებს და შეეწინააღმდეგება უცხოურ ძალებს, თუ ისინი მოინდომებენ, რომ საქართველოს წინააღმდეგ წავიდნენ.
„დარწმუნებული ვარ, მიხეილ ყაველაშვილი, ჩვენი გუნდის წევრი, შეძლებს, რომ დაუბრუნოს საპრეზიდენტო ინსტიტუტს ნდობა და ღირსება, რომელიც დაახლოებით ბოლო ათი წელია, წაართვეს მარგველაშვილმა და განსაკუთრებით, ზურაბიშვილმა. ყაველაშვილი იქნება პრეზიდენტი, რომელიც დაარწმუნებს საზოგადოებას, როგორი უნდა იყოს საქართველოს პრეზიდენტი – ქვეყნის ინტერესების გამტარებელი და არცერთ შემთხვევაში სხვა ქვეყნის ინტერესების გამტარებელი. ამიტომ კიდევ ერთხელ მინდა, საზოგადოებამ კარგად შეხედოს ამ პროცედურებს და ამ მომენტს, როცა შეიძლება ითქვას, რომ საქართველოს პრეზიდენტი გახდება ეროვნული იდენტობის ადამიანი, რომელიც დაიცავს ქვეყნის კონსტიტუციას, საქართველოს ინტერესებს და შეეწინააღმდეგება უცხოურ ძალებს, თუ ისინი მოინდომებენ, რომ საქართველოს წინააღმდეგ წავიდნენ“, – განაცხადა გურამ მაჭარაშვილმა საქართველოს პირველი არხის ეთერში.
ამასთან, გურამ მაჭარაშვილი ამბობს, რომ მიხეილ ყაველაშვილი იქნება ზეპარტიული პრეზიდენტი.
„მიხეილ ყაველაშვილი იქნება სწორედ ხალხის ხმის გამხმოვანებელი და ამაზე მეტყველებს თუნდაც „ხალხის ძალის“ ბოლო 2-3 წლის პოლიტიკა. ჩვენ ერთად ვიყავით ბოლო 2-3 წელი, ჩვენ გამოვედით „ქართული ოცნებიდან“. მიხეილ ყაველაშვილთან ერთად ვთქვით, რომ გამოვედით „ქართული ოცნებიდან“ სწორედ იმიტომ, რომ ხალხის სამსახურში ვყოფილიყავით და ამ შემთხვევაში ჩვენი, მათ შორის მიხეილ ყაველაშვილის პოლიტიკით ჩვენ ვემსახურებოდით ხალხს, ვაწვდიდით იმ ინფორმაციას ხალხს, რომელიც შეიძლებოდა გამხდარიყო მსხვერპლი უცხოური ძალების დეზინფორმაციისა. გამომდინარე აქედან, მიხეილ ყაველაშვილს არ უთქვამს, რომ მე „ქართული ოცნების“ ინტერესებიდან გამომდინარე, ვერ გავალ ახლა პარტიიდან, რადგან საჭიროა, ხალხმა იცოდეს სწორი ინფორმაცია. ზუსტადაც ჩადგა არა რომელიმე პოლიტიკური პარტიის ინტერესში, არამედ ხალხის ინტერესებში, ეს ფაქტი მეტყველებს, რომ ის იქნება ზეპარტიული პრეზიდენტი და სწორედ ხალხის სამსახურში. მიხეილ ყაველაშვილი არცერთ პარტიას არ მისცემს საშუალებას, თუ ისინი გადაწყვეტენ, რომ წავიდნენ საქართველოს წინააღმდეგ, ის ყოველთვის, როგორც პიროვნება და ამ შემთხვევაში უკვე პრეზიდენტი, ჩაუდგება სათავეში იმ ეროვნულ პროცესს, რაც აქამდე გაუკეთებია“, – აღნიშნა გურამ მაჭარაშვილმა.