ომის ყოველი დამატებითი თვე უკრაინისთვის დემოგრაფიულ დანაკარგებს ნიშნავს და საუბარია არა დაღუპულებზე, არამედ მილიონობით უკრაინელზე, ვინც არასდროს დაბრუნდება საზღვარგარეთიდან. ამის შესახებ დემოგრაფიისა და სოციალური კვლევის ინსტიტუტის დირექტორმა, ელა ლიბანოვამ CNN-ისთვის კომენტარში განაცხადა.
მან ხაზგასმით აღნიშნა, რომ სულ უფრო მეტი უკრაინელი ლტოლვილი ეჩვევა საზღვარგარეთ ცხოვრებას და საბოლოოდ, საერთოდ კარგავს უკრაინაში დაბრუნების სურვილს.
გარდა ამისა, ომის ყოველი თვე ნიშნავს დამატებით განადგურებას, ამიტომ უფრო მეტი ადამიანია, ვისაც უბრალოდ არსად აქვს დასაბრუნებელი.
დემოგრაფი ამბობს, რომ პესიმისტური სცენარის მიხედვით, ომის დასრულებამ შესაძლოა ემიგრანტების კიდევ ერთი ტალღა გამოიწვიოს.
„თუ ყველაფერი ძალიან ცუდად წარიმართება, ჩვენ შეგვიძლია დავინახოთ მიგრაციის კიდევ ერთი ტალღა საომარი მდგომარეობის გაუქმების შემდეგ – მამაკაცები წავლენ თავიანთ ცოლებთან და შვილებთან“, – აღნიშნა ლიბანოვამ.