მნიშვნელოვანია, რომ სახელმწიფო უსაფრთხოების სამსახურის ხელმძღვანელი ანგარიშს საზოგადოებას და ხალხის მიერ არჩეულ პარლამენტს აბარებს – განაცხადა საპარლამენტო უმრავლესობის ლიდერმა არჩილ თალაკვაძემ ჟურნალისტებთან საუბრისას:
„პარლამენტში ვახტანგ გომელაურის მოსვლით პასუხები ბევრ კითხვას გაეცემა, მათ შორის ოპოზიციის მუდმივ წუხილს იმის თაობაზე, პარლამენტში მოვა თუ არა უსაფრთხოების სამსახურის ხელმძღვანელი და ჩააბარებს თუ არა პარლამენტს ანგარიშს. ეს ძალიან საქმიანი ანგარიშია, რომლის განხილვა საქმიან გარემოში მოხდება. ანგარიში საჯაროა, რომელიც გამოქვეყნებულია და ხელმძღვანელის მიერ მისი წარდგენა საჯაროდ მოხდება. ყველა მოქალაქეს შესაძლებლობა ექნება, რომ ანგარიშის წარდგენას თვალი პირადად ადევნოს. რაც შეეხება კითხვა-პასუხის რეჟიმს, ეს ანგარიშის საჯაროობას კითხვის ნიშანს არ უსვამს. გვახსოვს, რომ კომიტეტის სხდომაზე, როგორც კი ჟურნალისტებმა დარბაზი დატოვეს, ოპოზიციონერებმა რიტორიკა შეცვალეს და საქმიან ფორმატში გააგრძელეს განხილვა. როგორც ჩანს, ქცევა კამერებთან და მის გარეშე, გარკველწილად განსხვავდება. ანგარიშის წარდგენა ღია იქნება, კითხვა-პასუხის რეჟიმი დახურულ ფორმატში გაგრძელდება“, – განაცხადა არჩილ თალაკვაძემ.