ამირან სალუქვაძე: სუს-ი ქვეყნის უსაფრთხოების დაცვაზე ეფექტურად მუშაობს

ბრიგადის გენერალი, ანალიტიკოსი სამხედრო-პოლიტიკურ და უსაფრთხოების საკითხებში, ამირან სალუქვაძე სახელმწიფო უსაფრთხოების სამსახურის 2016 წლის საქმიანობის ანგარიშსს და მასში დასმულ აქცენტებს დადებითად აფასებს.
როგორც სალუქვაძემ „კვირას“ განუცხადა, სახელმწიფოს წინაშე ძალიან ბევრი გამოწვევა არსებობს და მათ მხოლოდ უსაფრთხოების სამსახური ვერ გაუმკლავდება. მისი შეფასებით, სუს-ი კომპეტენციის ფარგლებში, ეფექტურად მუშაობს ქვეყნის უსაფრთხოების დაცვაზე.
„სახელმწიფოს წინაშე ძალიან ბევრი გამოწვევა არსებობს, ამ გამოწვევებს მხოლოდ სახელმწიფო უსაფრთხოების სამსახური ვერ გაუმკლავდება. ყველაზე დიდი გამოწვევა რუსული აგრესიაა, ის ქმედებები, რასაც ოკუპირებულ ტერიტორიებზე აქვს ადგილი. ჩვენ არ უნდა დავსახოთ არარეალური ამოცანები და შეუძლებელი არ უნდა მოვითხოვოთ სხვადასხვა უწყებებისგან, მათ შორის სუს-ისგან. სუს-ი უფლებამოსილების ფარგლებში ამ კუთხით ყველაფერს აკეთებს. ვხედავთ როგორ მოქმედებს რუსეთი თავის საზღვრებს გარეთ, ამისი ნათელი მაგალითია სირიაში განვითარებული მოვლენები. ზესახელმწიფოებიც კი ცდილობენ არ წავიდნენ რუსეთთან დაპირისპირებაზე. ჩვენ უნდა ვიმოქმედოთ არსებული რეალობის გათვალისწინებით. საჭიროა შეთანხმებული მოქმედება, ახლა პოლიტიკური ქულების მიღებისთვის ბრძოლის დრო არ არის“, -განაცხადა ამირან სალუქვაძემ.
სალუქვაძის თქმით, ბოლო წლების განმავლობაში ქვეყანაში ისეთი არაფერი მომხდარა, რაც შექმნიდა იმის თქმის საფუძველს, რომ სუს-ი არაეფექტურად მუშაობს.
„დასახელდა ციფრები, რასაკვირველია, ჩვენ ხელი არ მიგვიწვდება და ვერ გავიგებთ რა დეტალებზეა საუბარი, თუმცა ციფრებიდან ჩანს, რომ უცხო ქვეყნების სპეცსამსახურები კვლავაც აქტიურად მოქმედებენ ჩვენს ტერიტორიაზე და ამ მხრივ, სახელმწიფო უსაფრთხოების სამსახურს სამუშაო ალბათ მომავალ წლებშიც არ მოაკლდება“, – აღნიშნავს სალუქვაძე.
სალუქვაძე იწონებს იმ გადაწყვეტილებას, რომლის თანახმადაც სახელმწიფო უსაფრთხოების სამსახურის უფროსის მოსმენა დახურულ ფორმატში გრძელდება. ბრიგადის გენერალი ამბობს, რომ ეს დეპუტატებს აძლევთ საშუალებას მათთვის საინტერესო საკითხებზე დეტალური ინფორმაცია მიიღონ სუს-ის ხელმძღვანელისგან.
„მე რომ დეპუტატი ვყოფილიყავი და სახელმწიფო უსაფრთხოების სამსახურის ხელმძღვანელთან კითხვები მქონოდა, რა თქმა უნდა, სხდომის დახურვას დავუჭერდი მხარს. აღნიშნული ფორმატი იძლევა საშუალებას დეპუტატებმა მიიღონ ის ინფორმაცია, რაც საჯაროდ ვერ იქნება გამოტანილი ქვეყნის ინტერესებიდან გამომდინარე. სუს-ი არ არის სოფლის მეურნეობის ან ეკონომიკის სამინისტრო, რომ ყველა ინფორმაცია გაასაჯაროოს, თუმცა სოფლის მეურნეობის და ეკონომიკის სფეროშიც არის რაღაც საკითხები, რაც სახელმწიფო ინტერესებიდან გამომდინარე, არ უნდა გასაჯაროვდეს. ღია ფორმატში, რომ წარმართულიყო კითხვა-პასუხის რეჟიმი, ეს სუს-ის ხელმძღვანელისთვის იქნებოდა შესაძლებლობა თავი აერიდებინა რიგ კითხვებზე და ეთქვა, რომ სახელმწიფო ინტერესებიდან გამომდინარე, საჯაროდ ვერ გააკეთებდა ამა თუ იმ საკითხზე განცხადებას, დახურულ ფორმატში კი კანონმდებლებს აქვთ საშუალება უფრო ამომწურავი ინფორმაცია მიიღონ იმასთან დაკავშირებით, თუ რა სახის გამოწვევებთან გვაქვს საქმე“, – აღნიშნა ამირან სალუქვაძემ.
სახელმწიფო უსაფრთხოების სამსახურის უფროსის მოსმენა დახურულ ფორმატში გრძელდება. მანამდე გომელაურმა ღია ფორმატში კანონმდებლებს სუს-ის მიერ გაწეული საქმიანობის ყოველწლიური ანგარიში გააცნო.