ზუგდიდში მიმდინარე ინფრასტრუქტურულ პროექტებს სამეგრელო-ზემო სვანეთის სახელმწიფო რწმუნებული დავით ვერავა ზუგდიდის დელეგატთან დავით კოდუასთან ერთად გაეცნო.
სახელმწიფო რწმუნებული გზების რეაბილიტაციის პროცესს წულუკიძის ქუჩაზე, დასრულებულ სამუშაოებს კი ქუთაისის ქუჩაზე გაეცნო. არსებულ ქუჩებთან ერთად ზუგდიდში 70-მდე შიდა ქუჩის რეაბილიტაცია ხორციელდება. სამუშაოების უმეტესობა დასრულებულია.
სახელმწიფო რწმუნებულის განცხადებით, სამუშაოები რეაბილიტაციის გარეშე დარჩენილ ქუჩებზეც ჩატარდება. მისივე განმარტებით, პროექტების განხორციელება სწრაფად და ხარისხიანად მოხდება, რათა მოქალაქეებმა სარგებელი დროულად და შეფერხებების გარეშე მიიღონ.
„ზუგდიდში საგზაო ინფრასტრუქტურის მშენებლობა-რეაბილიტაციის სამუშაოები აქტიურ რეჟიმში მიმდინარეობს. ამჟამად სამუშაოების მიმდინარეობას ქალაქის ქუჩებში გავეცანით. ჯამში, ამ ეტაპისთვის მხოლოდ ქალაქში, 70 ქუჩის რეაბილიტაციას ვახდენთ. ცხადია, პროცესი კიდევ უფრო გაძლიერდება. ჩვენ მიზანია, პროექტების სწრაფად, შეფერხებების გარეშე და ხარისხიანად შესრულება, რათა მოქალაქეებმა მაქსიმალურად ისარგებლონ არსებული სერვისებითა და პროექტებით“, – განაცხადა სახელმწიფო რწმუნებულმა.
დავით ვერავა დღესვე გაეცნო ზუგდიდში ფუნიკულიორის მიმდებარედ მიმდინარე სამუშაოებს. დავით ვერავასთან და დავით კოდუასთან ერთად ინფრასტრუქტურული სამუშაოების დათვალიერებისას რწმუნებულის მოადგილე და ზუგდიდის მერის მოადგილე, შესაბამისი სამსახურების წარმომადგენლებთან ერთად იმყოფებოდნენ.