აბსოლუტურად უტიფრად, უნამუსოდ, ხეპრულად გამოდის ვინმე ოლესია ვართანიანი და აკეთებს მოხსენებას იმასთან დაკავშირებით, რომ ეს არ ეხება სომხეთს და საქართველოა დამნაშავე ასეთ გადაცდომაში, რასაც ჰქვია რუსეთისთვის ხელშეწყობა სანქციების გვერდის ავლის საქმეში, – განაცხადა პარლამენტის თავმჯდომარის პირველმა მოადგილე გიორგი ვოლსკიმ, რითაც ჰელსინკის კომისიის სხდომაზე საქართველოს წინააღმდეგ გაკეთებულ შეფასებას გამოეხმაურა.
მისი თქმით, ვინმე ვართანიანი ცდილობს, რომ საქართველოს მისამართით ცილისმწამებლური განცხადებებით სომხეთსა და საქართველოს შორის ურთიერთობები გააფუჭოს, რაც არ მოხდება.
„ეს იმას არ ნიშნავს, რომ ჩვენ და სომხეთს შორის რაიმე ურთიერთობები ამით არის დაზიანებული. პირიქით, ჩვენი ურთიერთობები როგორც იყო მეგობრული, ასევე რჩება. მაგრამ ადამიანები არსებობენ, რომლებიც განგებ, განზრახ მრავალი მიმართულებით თესავენ ამ ბოროტებას. ერთი, რომ თითქოს საქართველოს და სომხეთის დაპირისპირებას ახდენს და მეორე, სრულ სიცრუეს ავრცელებს იმასთან დაკავშირებით თუ როგორ იქცევა საქართველო“, – განაცხადა გიორგი ვოლსკიმ.
ცნობისთვის, ჰელსინკის კომისიის სხდომას სამხრეთ კავკასიის უსაფრთხოების საკითხებში ექსპერტის სტატუსით ესწრებოდა პროფესიით ჟურნალისტი ოლესია ვართანიანი. მან რუსეთისთვის სანქციების გვერდის ავლაში დახმარებაზე საუბრისას ანტისახელმწიფოებრივი განცხადება გააკეთა და ისრები საქართველოსკენ გადმოიტანა.