ჯეიჰუნ ბაირამოვთან შეხვედრაზე ვისაუბრეთ ელექტოროკაბელის პროექტზე, რომელიც ძალიან მნიშვნელოვანი პროექტია მომავლისთვის, საქართველოსთვისაც, აზერბაიჯანისთვისაც, დიდი რეგიონისთვის, შავი ზღვის გავლით დაკავშირებადობისთვის, რაც კიდევ უფრო გამოგვაყენებინებს ჩვენს შესაძლელობებს. ამ კონტექსტში მნიშვნელოვანია სხვადასხვა ფორმატში თანამშრომლობა, – ამის შესახებ საქართველოს საგარეო საქმეთა მინისტრმა, მაკა ბოჭორიშვილმა აზერბაიჯანის რესპუბლიკის საგარეო საქმეთა მინისტრთან, ჯეიჰუნ ბაირამოვთან ერთობლივ პრესკონფერენციაზე განაცხადა.
„პირველ რიგში, ხაზს გავუსვამ აზერბაიჯანს, თურქეთსა და საქართველოს შორის არსებულ სტრატეგიულ პარტნიორობას და ამ ფარგლებში ჩვენს თანამშრომლობას. იმედი მაქვს, ძალიან მალე გვექნება შესაძლებლობა, სწორედ ამ ფორმატში საგარეო საქმეთა მინისტრების შეხვედრა გაიმართოს და ვისაუბროთ სამმხრივი თანამშრომლობის კიდევ უფრო გაღრმავებაზე“, – განაცხადა ბოჭორიშვილმა.
ამასთან, მისივე თქმით, მნიშვნელოვანია ის თანამშრომლობა, რომელიც არის საქართველოს, აზერბაიჯანს, რუმინეთსა და უნგრეთს შორის, რაც მნიშვნელოვანია ჩვენი რეგიონის პოტენციალის უკეთ გამოყენებისთვის უფრო მეტი საინტერესო პროექტის განსახორციელებლად, რათა ჩვენი რეგიონის შესაძლებლობები კიდევ უფრო კარგად იყოს გამოყენებული.
„რა თქმა უნდა, ამ ყველაფრისთვის საჭიროა რეგიონში მშვიდობა, სტაბილურობა. სამწუხაროდ, საქართველო ჯერ კიდევ არის ქვეყანა, რომლის ორი რეგიონი ოკუპირებულია რუსეთის მხრიდან, რაც, რა თქმა უნდა, ჩვენი ქვეყნისთვის უსაფრთხოების გამოწვევებს ზრდის. ასევე, ის მოვლენები, რაც ვითარდება უფრო ფართო რეგიონში, უსაფრთხოების თვალსაზრისით, არის საფრთხის შემცველი, თუმცა საქართველოსა და აზერბაიჯანის ურთიერთობებში მნიშვნელოვანია ის ურთიერთპატივისცემა, სუვერენიტეტისა და ქვეყნის ტერიტორიული მთლიანობის პატივისცემა, რაც საფუძვლად უდევს სწორედ ჩვენს ურთიერთობებს“, – აღნიშნა ბოჭორიშვილმა.
საქართველოს საგარეო საქმეთა მინისტრის განცხადებით, საქართველო ყოველთვის იყო და იქნება რეგიონში მშვიდობის, სტაბილურობის ერთგული.
„საქართველო ყოველთვის მზად იქნება, ხელი შეუწყოს მეზობლებს შორის კეთილმეზობლური ურთიერთობების განვითარებას, რეგიონში მშვიდობის არსებობას, რაც მხოლოდ განავითარებს ჩვენი რეგიონის პოტენციალს და მოგვცემს ეკონომიკური შესაძლებლობების უკეთ გამოყენების შესაძლებლობას. ჩემთვის დიდი პატივი იყო, მომესმინა თქვენი მოსაზრებები სხვადასხვა მოვლენაზე, რომელიც ჩვენ გარშემო ვითარდება. რა თქმა უნდა, ჩვენ გავაგრძელებთ კიდევ უფრო ინტენსიურ ურთიერთობას, მეგობრობას, თანამშრომლობას, რომელიც მიმართული იქნება ჩვენი ქვეყნების ინტერესების უკეთ წარმოჩენისთვის საერთაშორისო არენაზე. ჩვენ მადლობლები ვართ თქვენი მხარდაჭერისთვის, რაც გვაქვს სხვადასხვა ფორმატში და, რა თქმა უნდა, ყოველთვის მზად ვიქნებით, უფრო ინტენსიურად ვითანამშრომლოთ ჩვენს სტრატეგიულ პარტნიორებთან“, – განაცხადა მაკა ბოჭორიშვილმა.