რუსეთმა უკრაინის წინააღმდეგ რაკეტებითა და უპილოტო საფრენი აპარატებით მასშტაბური შეტევა განახორციელა.
უკრაინის საჰაერო ძალების ცნობით, ღამის განმავლობაში რუსეთმა უკრაინის მიმართულებით 61 დრონი და ორი რაკეტა გაუშვა. უკრაინამ 46 უპილოტო საფრენი აპარატისა და ორივე რაკეტის ჩამოგდება შეძლო.
რუსეთი ოდესის, ხარკოვის, პოლტავის, სუმის, კიევის, ჩერკასის, დონეცკის, ზაპოროჟიის, დნეპროპეტროვსკის, ხმელნიცკის და კიროვოგრადის რაიონებს დაესხა თავს.
ჩერკასის ოლქის სამხედრო ადმინისტრაციის ხელმძღვანელის, იგორ ტაბურეცის ცნობით, რუსულმა დრონებმა დააზარალა კრიტიკული ინფრასტრუქტურის ობიექტი. შედეგად, ზოგიერთი ადამიანი, მათ შორის, ქალაქ ჩერკასში ელექტროენერგიის გარეშე დარჩა.
უკრაინის საგანგებო სიტუაციების სამსახურის მონაცემებით, ჩერკასის ოლქში დაზიანდა საცხოვრებელი სახლები. თავდასხმის შედეგად გაჩნდა ხანძარი.
დაშავებულების შესახებ ინფორმაცია ამ დრომდე არ გავრცელებულა.