გიორგი კვირიკაშვილმა განაცხადა, რომ დღევანდელ დღეს, 5 წლის წინ, ბიძინა ივანიშვილის მეთაურობით დაფუძნდა პოლიტიკური პარტია “ქართული ოცნება – დემოკრატიული საქართველო”, რომელმაც აღკვეთა რეპრესიული სისტემა.
მისივე თქმით, 5 წლის წინ, პარტიამ დაიწყო ბრძოლა ავტორიტარული რეჟიმის წინააღმდეგ. პარტია “ქართული ოცნება – დემოკრატიული საქართველოს” პოლიტიკურ სივრცეში გამოჩენამ გააჩინა იმედი იმისა, რომ სწორედ ეს პოლიტიკური ძალა ხალხთან ერთად დაამარცხებდა მოძალადე ხელისუფლებას და სახელმწიფო ნორმალური განვითარების გზას დაადგებოდა.
“სწორედ 5 წლის წინ, ბიძინა ივანიშვილმა ახლადშექმნილ პოლიტიკურ ძალასთან ერთად დაიწყო უკომპრომისო ბრძოლა და, თვეების განმავლობაში რეპრესიების, დარბევების, უკანონო დაპატიმრებების მიუხედავად, უსისხლოდ, ბრძოლის ერთადერთი იარაღით – პოლიტიკური მეთოდებით, არჩევნების გზით დაამარცხა არსებული რეჟიმი. “ქართული ოცნება – დემოკრატიული საქართველო” გახდა ის პოლიტიკური პარტია, რომელმაც ჩვენს ქვეყანაში დაიწყო რეალური დემოკრატიული ცვლილებები”, – განაცხადა გიორგი კვირიკაშვილმა.
პრემიერის განცხადებით, პარტიას “ქართული ოცნება – დემოკრატიული საქართველოს” ერთი მიზანი ამოძრავებს – ეს არის ერთიანი, დემოკრატიული და ძლიერი საქართველო, სახელმწიფო, რომელიც თითოეული მოქალაქის უფლებებისა და კეთილდღეობისთვის ზრუნავს.
ბიძინა ივანიშვილმა პოლიტიკური ინტერესები 2011 წლის ოქტომბერში გაახმოვანა, ხოლო იმავე წლის დეკემბერში დააფუძნა საზოგადოებრივი მოძრაობა “ქართული ოცნება”. 2012 წლის თებერვალში მან პარტიის საინიციატივო ჯგუფი დაასახელა და გააფორმა კოალიცია რესპუბლიკურ პარტიასთან, თავისუფალ დემოკრატებთან, ეროვნულ ფორუმთან ერთად.