“ევროპულმა სასამართლომ პრაქტიკულად მოგვცა დავალება, რომ გამოვიძიოთ „ნაციონალური მოძრაობის“ დროს ჩადენილი სისტემური დანაშაული”

ეს არის არა ცალკეული პირების, არამედ სისტემის და მისი შემქმნელების მიერ ჩადენილი დანაშაული და ამ სისტემის შემქმნელი იყო „ნაციონალური მოძრაობა“ და მის სათავეში მდგომი პრეზიდენტი მიხეილ სააკაშვილი, – განაცხადა პარლამენტის ვიცე-სპიკერმა, „ხალხის ძალის“ თავმჯდომარემ სოზარ სუბარმა.

„ის, რომ ამ [წამებას და არაადამიანურ მოპყრობას სასჯელაღსრულებით დაწესებულებებში] დანაშაულს ჰქონდა სისტემური ხასიათი, ეს დაადგინა ადამიანის უფლებათა ევროპულმა სასამართლომ და პრაქტიკულად ამით მოგვცა დავალება, რომ გამოვიძიოთ ეს დანაშაული. ეს არის არა ცალკეული პირების, არამედ სისტემის და მისი შემქმნელების მიერ ჩადენილი დანაშაული და ამ სისტემის შემქმნელი იყო „ნაციონალური მოძრაობა“ და მის სათავეში მდგომი პრეზიდენტი მიხეილ სააკაშვილი“, – აღნიშნა სუბარმა.

მომავალ კვირას პარლამენტში დროებითი საგამოძიებო კომისია შეიქმნება, რომელიც „ნაციონალური მოძრაობის“ რეჟიმის დროს ჩადენილ დანაშაულებს გამოიძიებს. მკვლელობებს, წამებას, საპატიმროებში არსებულ ვითარებას, ბიზნესის რეკეტს და ომის დანაშაულს. კომისიამ დასკვნა 6 თვეში უნდა წარადგინოს. შედეგი კი უნდა იყოს როგორც სამართლებრივი, ისე პოლიტიკური პასუხისმგებლობა.