დამოუკიდებელი საქართველოს ისტორიაში პირველად ხდება, რომ ხელისუფლება საკუთარი ხელით იზღუდავს სუბიექტურ გარანტიებს, – ამის შესახებ პარლამენტისა და საკონსტიტუციო კომისიის თავმჯდომარემ ირაკლი კობახიძემ სახელმწიფო საკონსტიტუციო კომისიის დასკვნითი სხდომის დასრულების შემდეგ განაცხადა.
“დამოუკიდებელი საქართველოს ისტორიაში პირველად ხდება, რომ ხელისუფლება საკუთარი ხელით იზღუდავს სუბიექტურ გარანტიებს. ეს არის პირველი შემთხვევა, როდესაც ცვლილებები ეწინააღმდეგება მმართველი გუნდის სუბიექტურ ინტერესებს. ამ სულისკვეთებითაა ჩამოყალიბებული დოკუმენტი. ჩვენს წინაშე პარლამენტის მხრიდან ორი ამოცანა იყო დასახული, პირველ რიგში, კონსტიტუციის სრული შესაბამისობის უზრუნველყოფა კონსტიტუციური სამართლის პრინციპებთან. ეს მიზანი ზედმიწევნით მიღწეულია.
რაც შეეხება მეორე მიზანს, იყოს ძალიან მყარი კონსტიტუციური ფუნდამენტის შექმნა, სტაბილური, პლურალისტური, დემოკრატიული საპარლამენტო მმართველობის სისტემის ფორმირებისთვის. მეორე მიზანიც ზედმიწევნით მიღწეულია. სწორედ ამ ორ მიზანს ემსახურებოდა ის დოკუმენტი, რომელიც კომისიის მიერ შემუშავდა. ეს არის ძალიან დიდი მიღწევა. ჩვენ გვაქვს ძალიან დიდი იმედი, რომ საბოლოოდ პარლამენტში ექნება მხარდაჭერა იმ დოკუმენტს, რომელიც წარდგენილი იქნება სახელმწიფო საკონსტიტუციო კომისიის მიერ“, – განაცხადა კობახიძემ.
კობახიძემ კომისიის მუშაობა შეაფასა და აღნიშნა, რომ ჩართულობისა და ინკლუზიურობის ასეთი მასშტაბი ჩვენი სახელმწიფო საკონსტიტუციო კომისიების მუშაობის ხანმოკლე ისტორიას არ ახსოვს.
„ფართო ჩართულობის საფუძველზე, ჩვენ შევიმუშავეთ ძალიან დახვეწილი დოკუმენტი, რომელიც შესაბამისობაშია კონსტიტუციური სამართლის პრინციპებთან და აყალიბებს ძალიან დახვეწილ საპარალამენტო მმართველობის მოდელს, რომელიც ეფუძნება ევროპული ქვეყნების საუკეთესო პრაქტიკას“, – განაცხადა კობახიძემ.