დეზორიენტირებულია დღეს ოპოზიცია, აღარ იცის რა თქვას, აღარ იცის რას მიედ-მოედოს, თუმცა პერიოდულად მათი ნამდვილი ზრახვები, ნამდვილი მდგომარეობა და მათი ნამდვილი დამოკიდებულება შეერთებული შტატების ახალი ადმინისტრაციის პოლიტიკის მიმართ გამოსჭვივის ხოლმე, – განაცხადა გადაცემაში „იმედი LIVE“ პარლამენტის ვიცე-სპიკერმა და „ხალხის ძალის“ თავმჯდომარემ, სოზარ სუბარმა.
მისივე თქმით, ეს არის ზოგჯერ დედის გინება ტრამპისა და მისი პოლიტიკის მიმართ, რომელსაც პირდაპირი ტექსტით წერენ ოპოზიციონერი ლიდერები თავიანთ ფეისბუქ გვერდებზე.
„დეზორიენტირებულია დღეს ოპოზიცია, აღარ იცის რა თქვას, აღარ იცის რას მიედ-მოედოს, თუმცა პერიოდულად მათი ნამდვილი ზრახვები, ნამდვილი მდგომარეობა და მათი ნამდვილი დამოკიდებულება შეერთებული შტატების ახალი ადმინისტრაციის პოლიტიკის მიმართ გამოსჭვივის ხოლმე. ეს არის ზოგჯერ დედის გინება ტრამპისა და მისი პოლიტიკის მიმართ, რომელსაც პირდაპირი ტექსტით წერენ ოპოზიციონერი ლიდერები თავიანთ ფეისბუქ გვერდებზე, ზოგჯერ „ენჯეოშნიკები“ თუ „ენჯეოშნიცები“, რომლებიც ტრამპს უწოდებენ ნეოფაშისტს. ეს არის მათი დამოკიდებულება სინამდვილეში და ამ დროს ფაშიზმი იყო ის, რა პოლიტიკასაც თვითონ ახორციელებდნენ ძალიან ბევრი მიმართულებით. დღეს ეს პოლიტიკა იცვლება. იცვლება ისიც, რომ დაფინანსება მოაკლდათ, აღარ ექნებათ და უკვე გამართული აქვთ ვაი-ვიში, სამათხოვროდ დაიწყეს ხელის გაწვდენა.
ძალიან მაინტერესებს რა პასუხს გასცემენ იმ ადამიანებს, რომლებსაც ჩვენ მუდმივად ვაფრთხილებდით. მე, პირადად, თქვენი ეთერიდანაც არაერთხელ გამიფრთხილებია, რომ ნუ ჩადიხართ დანაშაულს, როდესაც გადიხართ შეკრებებზე, მანიფესტაციებზე, მიტინგებზე, თორემ ეს ოპოზიცია წავა სახლში მშვიდად, თქვენ დარჩებით კანონის პირისპირ მარტოდმარტო. მარტო დაგტოვებენ, ჯარიმაც თქვენი გადასახდელი იქნება, ციხეშიც არავინ ჩაჯდება თქვენს ნაცვლად. კანონი კანონია, კანონის წინაშე ყველა აგებს პასუხს და ის ოპოზიციონერები იქნებიან ისევ მშვიდად და გააგრძელებენ ქვეყნის საწინააღმდეგო მავნებლობას. სამწუხაროდ, ვინც არ დაიჯერა, იმათ მოუწევთ პასუხისგება, ბუნებრივია, კანონის წინაშე“, – აღნიშნა სოზარ სუბარმა.