პრემიერ-მინისტრის ვიზიტი ყაზახეთში გრძელდება. ირაკლი კობახიძეს და დელეგაციის წევრებს დღეს ყაზახეთის პრეზიდენტი უმასპინძლებს.
მანამდე უკვე გაიმართა შეხვედრა ყაზახ კოლეგასთან როგორც პირისპირ ისე გაფართოებულ ფორმატში. ყაზახეთის პრემიერმა საქართველოს მთავრობის მეთაურს არჩევნების შედეგი მიულოცა. ოლჟას ბეკტენოვმა აღნიშნა, რომ საქართველოს მთავრობის მეთაურის ვიზიტი ყაზახეთში ორმხრივ თანამშრომლობებში ახალ პერსპექტივებს აჩენს.
აღინიშნა სავაჭრო-ეკონომიკური კავშირების განვითარების დადებითი დინამიკა. მხარეებმა დადებითად შეაფასეს ორმხრივი სავაჭრო ბრუნვა, რომელიც 2024 წელს, გასული წლის ანალოგიურ პერიოდთან შედარებით, 25%-ით გაიზარდა.
შეხვედრისას ასევე განიხილეს ექსპორტის მოცულობის ზრდის პოტენციალი და ხაზი გაუსვეს ამ კუთხით არსებული შესაძლებლობების სრულად ათვისების მნიშვნელობას. ყურადღება გამახვილდა ტურიზმისა და საინვესტიციო სფეროში არსებულ თანამშრომლობაზე, ასევე შუა დერეფნის განვითარების ხელშეწყობისა და დამატებითი ტვირთების მოზიდვის მიმართულებით ერთობლივი ძალისხმევის მნიშვნელობაზე.