შავი ზღვის უბნის დასახლებაში 72 წლის მსახიობი ნუნუ ზაკალაშვილი 26 წლის მეზობელმა მოკლა. ბრალდებულმა ზაკალაშვილს ცივი იარაღის გამოყენებით სასიკვდილო ჭრილობები მიაყენა და შემთხვევის ადგილიდან მიიმალა. ამის შესახებ გაზეთი “პრაიმტაიმი” წერს.
მეზობლები და ნათესავები ურთიერთგამომრიცხავ ვერსიებზე საუბრობენ. ახლობლების ნაწილის ინფორმაციით, შელაპარაკების მიზეზი ძარცვა გახდა, ნაწილი კი მიიჩნევს, რომ ბრალდებულს სახლიდან არაფერი წაუღია და შელაპარაკების მიზეზი ბრალდებულისა და მოკლულის ალკოჰოლის ზემოქმედების ქვეშ ყოფნა იყო.
„პრაიმტაიმმა“ გაარკვია, რომ მკვლელობის დღეს ნუნუ ზაკალაშვილს ბრალდებულ გ.რ-სთან და კიდევ ერთ მამაკაცთან ერთად, რომელიც მეზობელ კორპუსში ცხოვრობს, სახლში სუფრა ჰქონდა გაშლილი. მესამე პირის ცნობით, მან ნუნუ ზაკალაშვილის სახლი ადრე დატოვა და მისთვის უცნობია, როგორ განვითარდა მოვლენები შემდგომ.
ნუნუ ზაკალაშვილის ერთ-ერთი მეზობლის თქმით, მოკლულს ბინაში ფული ჰქონდა და მკვლელობის მოტივიც შესაძლებელია, ეს ყოფილიყო.
როგორც სტატიიდან ირკვევა, მეზობლები ამბობენ, რომ ნუნუ ზაკალაშვილმა ცოტა ხნის წინ მიწის ნაკვეთი გაყიდა. მას აღებული ფული სახლში ჰქონდა შენახული. ალბათ, ალკოჰოლური თრობის ქვეშ მყოფმა ამის შესახებ ბრალდებულს უთხრა და მანაც ფულის წართმევა განიზრახა.
საინტერესო დეტალს უმხელს გამოცემას მოკლულის ახლობელი. ის ანონიმურობას ინარჩუნებს, თუმცა ირწმუნება, რომ დანაშაულის ჩადენის შემდეგ, მოკლულმა სახლის გასაღები აიღო, კარი დაკეტა და მიიმალა.
როგორც შემთხვევის ადგილზე მისულებმა გავარკვიეთ, ბრალდებული გ.რ. მამასთან ერთად ცხოვრობდა, ერთ-ერთ კომპანიაში მძღოლად მუშაობდა და არც წარსულშია ნასამართლევი. ოჯახს უჭირდა. ამაზე მეტყველებს ის ფაქტიც, რომ ბრალდებულის ბინის კარი დაკეტილი არ არის და კედელსა და კარს შორის ნაჭერია გაჩრილი, რათა კარი არ გაიღოს.
მეზობლები ყვებიან, რომ ბრალდებული შემჩნეული იყო ქურდობაში.
„მთელი ოჯახი ცნობილი იყო იმით, რომ სახლებიდან რაღაცების მოპარვა უყვარდათ, თუმცა ეს ბიჭი თუ ამის ჩამდენი იქნებოდა, ვერავინ მოიფიქრებდა“,-განაცხადეს მეზობლებმა „პრაიმტაიმთან“ საუბრისას.
ახლობლები ყვებიან, რომ ნუნუ ზაკალაშვილი თბილისში გორიდან 7-8 წლის წინათ წამოვიდა, მანამდე გორის თეატრში მსახიობი იყო, 30 წელი სცენაზე გაატარა და ბევრი დასამახსოვრებელი როლიც აქვს შექმნილი.
თბილისში მარტო ცხოვრობდა, მეზობლებთან კარგი ურთიერთობა ჰქონდა და კარჩაკეტილი არ იყო.
მთავარ კითხვის ნიშნად მკვლელობის მოტივი რჩება. რა ურთიერთობა ჰქონდა მოკლულს ბრალდებულთან? რა უნდოდა 26 წლის ახალგაზრდას 72 წლის მარტოხელა ქალბატონთან, ჰქონდათ თუ არა მსგავსი შეკრებები სხვა დროსაც? მოკლულის ახლობლები ამის შესახებ ინფორმაციას არ ფლობენ. რაც შეეხება მოკლულის კარის მეზობლებს, ისინი კარს მოკლულის ნათესავებსაც კი არ უღებენ.
“პრაიმტაიმი”